MLXXXV

Charles, etc. Savoir faisons, etc. nous avoir receu l’umble supplicacion de François de Montcatin1, natif de [p. 242] Montcatin en Toscanne, capitaine de la Roche sur Yon pour nostre très chier et très amé frere le roy de Sicille, duc d’Anjou2, contenant que, ung an après que nostre dit frere le remist en son service, il se accointa de son confesseur, par lequel il fist dire à nostre dit frere qu’il savoit maniere de faire argent d’arquemye, et qu’il feroit merveilles de y besoingner qui lui vouldroit bailler place pour ce faire. A quoy, sur son donné à entendre, nostre dit frere acquiessa et lui bailla la capitainerie de la dicte Roche sur Yon, et, en la presence de nostre dit frere, en la ville d’Angiers, pour acomplir ce qu’il avoit promis dudit argent d’arquemye, il print ung lingot d’argent, le mist en son pongnet bien à la moitié, puis rebrassa ses manches de sa robe, et ce fait le tira entre deux doiz, le laissa cheoir en ung croiset à fondre argent et mist ung charbon dessus, en maniere que nostre dit frere ne s’en apparceust point. Et ainsi par plusieurs foiz en a abusé, et lui porta son fait et conduite envers nostre dit frere le confesseur, l’aumosnier et ung surnommé Cotignon, soubz umbre de ce que le dit suppliant leur promettoit que, se son dit fait aloit bien, qu’il leur monstreroit et feroit quelque bien de la science de la dicte arquemye. Et depuis, c’est assavoir environ la [p. 243] veille de la Conception de Nostre Dame mil cccc. xliiii, arriva audit lieu de la Roche sur Yon Geuffroy Le Feron3, [p. 244] et vint denoncier audit suppliant sa venue ung nommé François Byecte4. La quelle chose venue à sa congnoissance, soubz umbre de ce que une femme nommée Jehanne Leuvronne lui avoit mandé que le dit Geuffroy lui avoit demandé où estoit le jardin du chastel, et qu’il se doubtoit qu’il voulsist à ceste cause faire quelque chose contre lui, veu que autresfoiz le dit Feron avoit esté cause de sa prison à Nantes, icellui suppliant arresta le dit Ferron ou chastel du dit lieu de la Roche sur Yon, et, environ deux heures après, envoia querir par ung de ses varletz la boiste dudit Ferron en l’ostellerie où il estoit logié en la ville. Et quant il la tint, la mist en ung coffre en la maison neufve qu’il a fait faire ou dit chastel. Ouquel le lendemain vint Jaquet Chabot5, lequel ennorta le dit suppliant de faire mourir le dit Geuffroy, à quoy il ne se voult consentir. Et après entrerent en parole de la boiste dudit Geuffroy, la quelle fut actainte du dit coffre, et l’ouvry le dit Chabot, en la [p. 245] presence dudit suppliant, et eulx deux visiterent les lettres qui estoient en la dicte boiste, et entre les autres trouverent ung blanc signé de nostre amé et feal chevalier, conseiller et chambellan, le sire [de] Coictivy, admiral de France6. Et dist lors le dit Chabot audit suppliant que, s’il [p. 246] vouloit, que on joueroit bien de ung tour audit Ferron, où il aroit grant dommaige. A quoy le dit suppliant respondy qu’il estoit content et qu’il ne lui chaloit que on lui fist, mais qu’il ne mourust. Et adonc le dit Chabot fist une faulse lettre, de laquelle le dit suppliant fit emplir le dit blanc, et fut mis ou fons de la dicte boiste, la quelle le dit Chabot fist reporter envelopée en ung manteau en la ville. Et tantost après la renvoya, par son page, refermée, audit suppliant, qui la remist en son dit coffre. Et le landemain par le conseil dudit Chabot, fist icelluy suppliant venir devers lui ou chastel le juge, l’advocat fiscal, le procureur, le greffier dudit juge et plusieurs autres des plus notables de la dicte ville, et en leur presence fist venir le dit Ferron, lui fist apporter la dicte boiste, lui demanda se c’estoit la sienne ; lequel respondit que oyl. Et lors lui en demanda la clef, laquelle lui fut baillée par ung des varletz dudit Ferron. Lequel, ce fait, il fist retraire, et, presens les dessus diz, ouvry la dicte boeste, leut et fist lire les lettres qui estoient dedans, et, entre les autres, celle qui avoit esté ainsi faulsement escripte oudit blanc ; laquelle lettre, pour la mauvaistié contenue dedans7, chascun des dessus diz leurent en blasmant très fort le dit Ferron de porter teles lettres. Non obstant toutes les quelles choses, le dit suppliant a detenu le dit Ferron prisonnier, et de lui a eu unze cens escuz d’or, une douzaine de tasses d’argent du poix de xxiiii. marcs et demy, drap de velours, avecques dix neuf francs cinq solz moins qui estoient en la boeste [p. 247] dudit Ferron, qui furent despenduz au dit lieu de la Roche sur Yon en despense de bouche8. Et ou mois de janvier [p. 248] oudit an mil iiii^c xliiii, nostre amé et feal chevalier et chambellan, [p. 249] Guy d’Ossigny9, acompaigné de cinquante hommes [p. 250] de guerre ou environ, arriva devant la dicte place de la Roche sur Yon, pour illec prendre le dit suppliant et ses serviteurs. Auquel icellui suppliant demanda s’il avoit mandement de nous de ce faire, offrant en ce cas lui obeir. A quoy nostre dit chambellan lui respondi que non, mais comme lieutenant de nous il avoit puissance. Et pour ce que sur ces termes, le dit suppliant ne voulu faire obeissance à nostre dit chambellan, icellui nostre chambellan s’efforça de prendre la dicte place. Et ce voyant le dit suppliant, doubtant la fureur de nostre dit chevalier, s’il advenoit que la dicte place fust prinse, dist à ses gens que chascun se deffendist, mesmement que nostre dit chevalier ne faisoit point apparoir de la dicte commission ou mandement de nous pour ce faire. Et lors icellui suppliant, acompaigné de treize ou quatorze hommes, sailly dehors [p. 251] la dicte place, et en combatant l’un de ses dictes gens tira ung trait, de quoy il frappa ung des gens de nostre dit chevalier qui en mourut. Et ce fait, se departy nostre dit chevalier et chambellan et ses dictes gens10. Pour occasion [p. 252] desquelz cas, le dit suppliant doubte que par rigueur de justice il ne lui conviengne miserablement finer ses jours, se nostre grace et misericorde ne lui sont sur ce imparties, si comme il dit, requerant humblement que, attendu que en tous ses autres faiz, il a esté tousjours de bonne vie, renommée et honneste conversacion, sans oncques mais avoir esté actaint ou convaincu d’aucun villain cas, blasme ou reprouche, nous lui vueillons subvenir de nostre dicte grace. Pour quoy nous, ces choses considerées, voulans grace et misericorde preferer à rigueur de justice, au dit suppliant avons quicté, remis et pardonné, etc., satisfaction toutesvoyes faicte à partie civilement tant seulement, se faicte n’est, et mesmement faicte à Geuffroy Le Ferron dessus nommé. Si donnons en mandement, par ces presentes, à noz amez et feaulx conseillers les gens tenans nostre present Parlement à Paris, aux seneschal de Poictou, bailli de Touraine et à tous noz autres justiciers, etc. Donné à Chinon, ou moys de fevrier l’an de grace mil cccc. xlv, et de nostre regne le xxiiii^e.

Ainsi signé : Par le roy, les contes de Foix11 et de Tancarville12, les sires de la Varenne, de Blanville, de Pressigny, de Maupas13 et autres presens. G. Herbert. — Visa. Contentor. E. Duban.