MCXVI

Charles, etc. Savoir faisons, etc. nous avoir receue l’umble supplicacion de nostre chier et bien amé Jehan de la Brunetiere1, escuier, contenant que, ung an et demy a ou [p. 353] environ, quoy que soit, durant le temps que estions ès marches de Lorraine, nostre amé et feal chevalier, Guy d’Auxigny, seigneur de Treves, vint avec puissance de gens et à port d’armes devant la place et forteresse de la Roche sur Yon, où le dit de la Brunetiere estoit lors demourant, pour icelle place et forteresse assaillir, comme l’en disoit. A l’encontre duquel d’Auxigny François de Montcatin, capitaine de la dicte forteresse, fist une saillie, en la compaignie duquel de Montcatin estoit ledit de la Brunetiere, et à icelle saillie fut tué ung homme de la compaignie dudit d’Auxigny ; lequel de la Brunetiere ne le tua ne frappa, ne [p. 354] par lui morut, mais seulement fut en la compagnie dudit de Montcatin. A la quelle cause il doubte que, pour le temps avenir, on ne lui en donne, en corps ou en biens, aucun destourbier ou empeschement, et pour ce nous a fait requerir que, comme le temps passé il nous ait servy à l’encontre de noz ennemys, ou fait de noz guerres, à l’occasion desquelles il ait esté par plusieurs foiz prisonnier et mis par eulx à grosses et excessives raençons, aussi qu’il ne fut pas cause de la dicte saillie ne dudit meurdre, mais seulement estoit en la compaignie dudit de Montcatin2, comme dit est, et que en tous autres cas il a esté homme de bonne vie, renommée et honneste conversacion, sans jamais avoir esté actaint d’aucun vilain cas, blasme ou reprouche, il nous plaise sur ce lui impartir nostre grace. Pour quoy nous, ces choses considerées et les bons services que nous a faiz en nos dictes guerres le dit de la Brunetiere, les grans peines et miseres qu’il a eues et soustenues ès dictes prisons, et les grans et excessives raençons que nos diz ennemis ont à ceste cause de lui exigées, ainsi qu’il nous a fait remonstrer, voulans pour ces causes et en [p. 355] faveur aussi de nostre très chier et très amé nepveu le duc de Bretaigne3, qui de ce nous a requis, misericorde preferer à rigueur de justice, à icellui de la Brunetiere, suppliant, avons ou dit cas quicté, remis et pardonné, etc. Si donnons en mandement par ces presentes aux seneschal de Poictou et bailli de Touraine et des ressors et Exempcions d’Anjou et du Maine, et à tous noz autres justiciers, etc. Donné à Razillé près Chinon, ou mois de may l’an de grace mil cccc. xlvi, et de nostre regne le xxiiii^me.

Ainsi signé : Par le roy, monseigneur le daulphin, monseigneur le duc de Bretaigne, vous, les sires de la Varenne, de Pressigny, de Blanville et plusieurs autres presens. Giraudeau. — Visa. Contentor. P. Le Picart.