MCXXI

Charles, etc. Savoir faisons, etc. nous avoir receue l’umble supplicacion de Jehan de Longpré, dit Heurtebise1, natif du païs de Lorraine, demourant à Montagu en nostre païs de Poictou, varlet de guerre, chargié de trois petis enfans, prisonnier en nostre Chastellet de Paris, contenant que ledit de Longpré s’en vint, lui estant jeune enfant, dudit païs de Lorraine demourer en France et se mist à estre page et servir les gens d’armes estans en nostre service et y demoura par long temps avecques feu le sire de Culant2, en son vivant admiral de France, et estoit arbalestrier. Et xviii. ans a et plus, à l’occasion de ce que le seigneur de Belleville et de Montagu estoit lors absent du païs, en nostre service, à la journée de Montargis3, et que les Bretons faisoient guerre audit lieu de [p. 383] Montagu, lui convint mettre des gens en garnison audit lieu de Montagu pour resister à l’encontre desdiz Bretons4, lesquelz pilloient et roboient toutes ses terres ; et admena avecques lui ledit de Longpré et autres audit lieu de Montagu et y a depuis demouré. Et certain temps après que ledit suppliant fut audit lieu de Montagu, il se maria avecques une jeune femme de la chastellenie dudit lieu, laquelle depuis ung an ença est alée de vie à trespassement. Et est ledit suppliant chargé de trois petis enfans, tous en bas aage ; durant lequel mariage dudit suppliant, il a tousjours demouré audit lieu de Montagu avecques sa dicte feue femme, et avoit la garde d’une des portes de la dicte ville de Montagu, sans aucunement partir de la dicte ville ; et s’est bien et gracieusement gouverné et vesqu sans faire tort à nullui. Et quant ledit s^r de Belleville venoit en nostre service ou fait de noz guerres, il admenoit le dit suppliant en sa compaignie, pour ce qu’il estoit très bon arbalestier et vaillant homme de son corps. Et pour ce que les diz Bretons faisoient guerre au dit lieu de Montagu et audit seigneur de Belleville, et tenoient grosses garnisons ès places de Paluya et les Exars, à Chasteaumur, Cliczon et autres places5, et couroient, pilloient et raençonnoient [p. 384] les terres de Montagu et de Belleville, ledit seigneur de Belleville pour ces causes mist garnison ès diz lieux de Montagu et Belleville. Durant lesquelles guerres et divisions, ledit de Longpré et autres de la garnison de Belleville, jusques au nombre de xvii, partirent à ung matin pour aler courir sur les dictes marches de Bretaigne et vindrent en deux ou trois villaiges d’emprès Montebert, et illec vouldrent prendre vivres, et prindrent deux jumens et autres bagues, pour en avoir des vivres. Et en eulx retournant, les Bretons qui estoient assemblez de soixante à quatre vins, qui estoient gens de plat pays, les rencontrerent et les assaillirent environ jour couchié, et pour les enclourre fermerent les chemins de barrieres de grans perches, tellement qu’ilz ne peurent aler plus avant. Et lors, quant ilz se virent ainsi chaciez et en dangier de mort ou d’estre prins, ilz se misdrent parmy lesdiz Bretons et se combatirent ensemble, ainsi qu’ilz peurent et de nuit, et tellement que les trois des [dix] sept compaignons, de la compaignie desquelz estoit ledit suppliant, furent bleciez et ung de leurs chevaux tué, et pareillement blecerent plusieurs des diz Bretons, mais ne scet combien, et en fut tué deux, et l’un des diz Bretons blecié fut admené prisonnier à l’Abergement près dudit Montagu, où ilz retournerent couchier. Et le landemain ceulx de la dicte garnison de Belleville enmenerent ledit prisonnier audit lieu de Belleville, où ilz le garderent longuement, pour estre recompensez dudit cheval qui avoit esté tué, telement qu’il y morut, ainsi que oït dire ledit suppliant, lequel demouroit à Montagu. Et que du temps [p. 385] que nostre très chier et amé cousin, le conte de Penthievre, tenoit le siege contre les Anglois, noz anciens ennemis, en Pierregort, qui fut en l’an mil cccc.xxxvii6, le dit suppliant ala avec autres gens de guerre, jusques au nombre de xiii. compaignons de guerre, en la compaignie du bastard de la Trimoïlle7, qui assembloit gens, pour aler secourir le siege que tenoit nostre dit cousin de Penthievre. Et ainsi que lesdiz compaignons vouldrent partir dudit Montagu, trouverent à Saint George, en l’ostellerie Herbretin, maistre Guillaume Prate, archediacre de Thouars, et prindrent deux chevaulx et lui osterent xxiii. royaulx, et enmenerent lesdiz chevaulx à la place de l’Abergement Ydereau, qui est au feu sire de la Trimoïlle. Et le landemain au matin, ledit seigneur de Belleville envoya devers eulx ung de ses gens et fist rendre lesdiz chevaulx audit archediacre, mais ledit argent fut departi entre eulx, et en eut ledit suppliant à sa part ung royal et demy. Et depuis, et environ l’an mil cccc.xxxviii, durant la guerre qui estoit lors entre ledit seigneur de Belleville et le feu sire de Raix, lequel tenoit à Thiffauges en garnison8, qui ne distoit de Montagu que [p. 386] de trois lieues, Thomas Fessart et Loys de Bromers, cappitaines de gens d’armes, qui avoient audit lieu de Thiffauges iii^c chevaulx et plus ; et le dit seigneur de Belleville tenoit audit Montagu Gascon de Lesgo, cappitaine dudit Montagu, qui povoit avoir vi^xx chevaulx et plus, et faisoient guerre d’un cousté et d’autre, et appatissoient les terres de ceulx qui leur estoient contraires. Et pour ce que ceulx de la parroisse du Longeron, qui est de la chastellenie de Thiffauges, s’estoient appatissez audit Gascon à la somme de cent escuz, ledit Gascon pour en estre paié, envoia ledit suppliant et six autres de la dicte garnison de Montagu pour prendre les commissaires, et de fait prindrent ung homme du villaige du Pouet qui est de la paroisse dudit Longeron, et l’admenerent audit Montagu devers ledit Gascon, qui par ce moyen fut paié desdiz cent escuz sur ladicte parroisse, et après fut delivré. Et avecques ce, environ le mois (sic) mil iiii^cxxxix. que le conte d’Autiton9, Anglois, estoit descendu ès parties de Xanctonge [p. 387] et que les seigneurs du païs firent mander, ledit seigneur de Belleville mena ses gens celle part et en s’en retournant audit lieu de Montagu, xxiiii. de ses gens voulurent passer par le bourg de Saint George, ouquel bourg y avoit des Bretons pour la garde de ladicte forteresse, qui empescherent le passaige des dessus diz et tirerent contre eulx, et tellement que le cheval du bahu dudit seigneur de Belleville fut blecié. Et lors les diz xxiiii. descendirent à pié et rebouterent ceulx de la dicte forteresse jusques dedans la place, et en les chassant, fut tué d’un trait ung de ceulx qui estoient ès creneaulx de la dicte forteresse, et la ledit supplianl confessé l’avoir fait ; quoyque soit, tira de l’arbaleste à l’encontre de lui, comme les autres de sa compaignie. Et depuis quatre ans ença, et ou temps que Bonneville tenoit la place de Vendrines, que lui avoit baillé ledit seigneur de Belleville, icellui Bonneville commist ung lieutenant à la garde d’icelle, et s’en vint en France où il fut long temps. Et pour ce que ledit lieutenant recevoit en la dicte place gens de guerre qui pilloient et couroient les terres dudit seigneur de la Trimoïlle, icellui seigneur de la Trimoïlle10 rescrivit au dit seigneur de Belleville qu’il fist vuidier ceulx de la dicte place, ou autrement qu’il y mettroit le siege et raseroit la place. Après lesquelles choses, ledit seigneur de Belleville mist hors de la dicte place ledit lieutenant et y en mist ung autre pour lui. Et quant ledit Bonneville fut retourné et qu’il trouva autre lieutenant en ladicte place que cellui qu’il y avoit commis, il reprist la dicte place sans le congié dudit seigneur de Belleville, et chassa hors ledit lieutenant, dont ledit seigneur de Belleville fut malcontent et deliberé de reprendre ladicte place ; et pour ce faire, il partit de Montagu pour aler à [p. 388] Chavergnes11, qui diste dudit lieu de Vendrines de deux lieues ou environ, et en sa compaignie estoit ledit suppliant. Et par aucuns des gens dudit seigneur de Belleville ledit de Bonneville fut prins et gardé audit lieu de Vendrines, jusques à ce que ledit seigneur de Belleville y ala. Et lequel fist mener ledit de Bonneville audit lieu de Montagu par ledit suppliant. Et que durant les guerres qui lors estoient ou païs, ledit suppliant fut en plusieurs lieux pour amasser vivres et lever appastiz, qui leur estoient assignez pour leurs vivres, tant en la chastellenie de Montagu que ailleurs, et a esté en plusieurs destrousses en la compaignie de plusieurs gens de guerre, destroussé plusieurs gens de divers estaz, couru foires et marchiez et espié et aguetté chemins, et fait plusieurs autres pilleries, roberies, rençonnemens, destrousses et autres choses, durant les dictes guerres et divisions. Pour occasion desquelz cas, ledit suppliant est detenu prisonnier en nostre Chastellet de Paris, et doubte que on vueille contre lui proceder rigoureusement et à pugnicion, se nostre grace et misericorde ne lui estoient sur ce imparties, humblement requerant que, attendu qu’il nous a servi ou fait de noz guerres et est prest de faire, et que les choses dessus dictes qu’il a faictes et commises ont esté à l’occasion de la guerre, etc., et que nous avons donné abolicion à tous ceulx qui nous ont servi ou fait de noz guerres, et n’a tenu autre parti que le nostre, ne servi cappitaine ne autre qui ait esté contraire à nous, il nous plaise sur ce lui impartir icelles. Pour quoy nous, attendu ce que dit est, voulans preferer misericorde à rigueur de justice, audit suppliant avons remis, quicté, pardonné et aboly, etc., excepté toutesvoyes meurdres d’aguet apensé, autre que celui dont dessus est faicte mencion, boutement de feux, violement d’eglises et ravissement de femmes, etc. Si donnons en [p. 389] mandement, par ces mesmes presentes, aux prevost de Paris, seneschaulx de Poictou et de Xanctonge, et à tous noz autres justiciers, etc. Donné à Saint Martin de Candé, ou mois d’aoust l’an de grace mil cccc.xlvi, et de nostre regne le xxiiii^e.

Ainsi signé : Par le roy, à la relacion du conseil. Rippe. — Visa. Contentor. E. Duban.