CCCCLXXVII

Charles, etc. Savoir faisons à tous, presens et avenir, que, comme nous aions entendu que Jehan Roudoit1, escuier, ait par lonc tamps esté et encores soit de l'obeissance et subjection de Edwart de Gales, filx ainsné du roy d'Angleterre, et ait tenu et tiengne leur partie et leur soit en ayde en la guerre que il nous ont nouvellement commenciée, et Margot de Ri2, dame du dit lieu de Ri, fame du dit Jehan, eust nagaires fait derrieres le chevet de son lit en sa chambre, ou mur de la forteresse du dit lieu de Ri, un pertruis pour y mettre et recevoir le dit Jehan, son mari, nostre rebelle, adherent et de l'obeissance de noz dis annemis, et ceulx que il y voudroit amener et mettre pour nous en faire guerre ; et pour ce lez gens de nostre très chier frere le duc d'Anjou, ce venu à leur congnoissance, aient fait prendre la dite Margot et la font detenir ez prisons de nostre dit frere ; et pour cause et occasion de cez choses, le dit lieu de Ri avec sez appartenances et tous biens meubles et heritages dez dis mariez, en quelconque lieu ou jurisdicion que il soient situez en nostre royaume, nous soient advenus et confisqués ; nous, pour consideracion des bons et aggreables services que [p. 9] nostre amé et feal chevalier, Baudoin de Crenon3, nous a fais et que nous esperons que il nous face encores, ou tamps avenir, avons à ycellui Baudoin donné et octroyé, donnons et octroions par ces lettres, de grace especial, le dit lieu ou chastel de Ri, avec toutes ses appertenances et appendances, en quelconques choses ou valeur que elles soient, à tenir et possider par lui, ses hoirs ou successeurs, ou ceulx qui auront cause de lui, perpetuelment et paisiblement, sans empeschement ou contredit, ainsy toutevoyes que, se par voye de traitié ou autrement estoit acordé par nous, ou de noz successeurs, de lez rendre et restituer aus dis mariés ou à leurs hoirs, ou aians cause, le dit Baudoin ne ses dis hoirs ou aians cause n'en pourront demander aucune recompensacion. Si donnons en mandement, par ces lettres, au seneschal d'Anjou et à tous lez autres justiciers de nostre royaume, et à tous commis et deputés ou à deputer sur le fait dez dites confiscations, presens et avenir, ou à leurs lieux tenans, et à chascun d'eulx, si comme à lui appertendra, que le dit Baudoin, ou son procureur pour lui, mettent ou facent mettre en possession et saisine du dit lieu ou chastel de Ri, et de ses dites appertenances, et l'en facent et laissent joir et user paisiblement, jouxte nostrepresente grace et octroy, cessant tout empeschement. Et que ce soit ferme, etc. Sauf, etc. Donné à Paris, le xxvii^e jour de novembre l'an de grace mil ccc soixante nuef, et de nostre regne le sisiesme.

Par le roy. Yvo.