CCCCXCIX

Charles, etc. Savoir faisons à tous, presens et avenir, que Regnaut Germaut1, escuier, nous a exposé que, comme il et son frere, ou temps que il vivoit, lequel a nagaires fini ses jours en la compaignie de nostre amé et feal chambrelan, Bertran de Guesclin, conte de Longueville, nous aient bien et loyalment servi en noz guerres, et encores fait le dit exposant de jour en jour, et tant que il a esté pris par noz ennemis et mis à grant et excessive raençon, pour la quelle paier et aussi pour soy monter et armer, il a ja pieça vendu de ses biens jusques à la value de xxx. livres ou environ de rente à pluseurs gens du païs de Guienne, tant il comme ses predecesseurs, et il soit ainsi que à present ledit exposant, sa mere et un sien oncle soient tenus en pluseurs rentes aux dictes [gens du païs] de Guyenne, en la somme et quantité de xliiii. sextiers de blé et en la somme de xlix. solz en deniers, c'est assavoir à Symon Burlé2, chevalier, à cause de sa femme, la somme de xiii. [p. 68] sextiers de blé de rente annuelle et perpetuelle, et ès arrerages de iiii. ans d'une part, et pluseurs autres du dit païs en la somme de trente un sextiers de blé et de xlix. solz en deniers de rente annuelle et perpetuelle et ès arrerages de trois ans ; la quelle rente et arrerages nous soient acquises et confisqués pour cause de la rebellion et desobeissance des dictes gens qui se sont portés et portent [p. 69] comme noz ennemis, si comme dit le dit exposant, le quel nous a humblement supplié que, consideré les services dessusdiz, ès quelz il est prest de continuer toutes fois que mestier sera, nous li vueillons donner la dicte rente, c'est assavoir que de la pourcion que il doit des dictes rentes annuelles à noz dis ennemis, le veillons tenir quicte et paisible à tous jours mais, et faire entrer en sa main sa [p. 70] dicte mere et son dit oncle du demourant des dictes rentes que doivent à noz dis ennemis, et leur faire commandement de par nous que doresenavant il les paient au dit suppliant, ses hoirs et successeurs. Nous adecertes, eu regart et consideration aux services et autres choses dessus dictes, avons donné et donnons, de grace especial et de certaine science, au dit suppliant, pour li, ses hoirs [p. 71] et successeurs et aians cause perpetuelment à tous jours mais, ou cas dessus dit, la dicte quantité de xliiii. sextiers de blé et de xlix. solz en deniers. Si donnons en mandement par ces presentes au seneschal d'Anjou et de Thouraine, ou à son lieutenant, au receveur et commis à recevoir les forfaictures ou dit païs, et à chascun d'eulz, que de la rente de blé et d'argent dessus divisée, c'est assavoir de la partie et pourcion du dit suppliant, il le tiengnent quicte et paisible doresenavant à tous jours mais, et sa dicte mere et son dit oncle facent entrer en la main du dit suppliant, pour li et pour ses successeurs et aians cause, du demourant que il doivent des dictes rentes avec les arrerages du temps passé dessus devisiez, lesquelles rente et arrerages nous sont avenues et confisquées par les causes dessus dictes, en le faisant joir et user paisiblement de nostre presente grace, ou cas toutevoie que pour les services dessusdiz ycelui suppliant n'aura eu de nous ou de nostre très cher et très amé frere et lieutenant, le duc d'Anjou, aucune autre grace. Non contrestant quelconques dons et assignations faites ou à faire sur ycelles rentes et arrerages, ordenances, mandemens ou deffenses et lettres subreptices empetrées au contraire. Et que ce soit chose ferme, etc. Sauf, etc. Donné au Bois de Vincennes, ou mois de juing l'an de grace mil ccc. lxx, et de nostre regne le vii^e.

Autresfois ainsin signée : Par le roy en ses requestes, et puiz par vous corrigées. J. Grellier. — Visa. Filleul.