DXXII

Karolus, Dei gracia Francorum rex. Notum facimus universis, tam presentibus quam futuris, nos litteras inclite [p. 147] recordacionis domini et progenitoris nostri in cera viridi et filis cericeis sigillatas, formam que sequitur continentes : Johannes, Dei gracia Francorum rex, etc.1. Quibus litteris suprascriptis nobis, ex et pro parte operariorum et monetariorum Monete nostre Pictavensis de juramento Francie, nuper existencium subditorum et in obediencia Eduardi de Anglia, inimici nostri, presentatis, iidem operarii et monetarii nostri nobis humiliter supplicarunt ut, cum ipsi semper fuerint et sint de dicto Francie juramento, et ad nostram veram et meram obedienciam de novo sint reducti, debeantque previlegiis, libertatibus et franchisiis, ceteris operatoribus et monetariis de dicto juramento concessis, uti et gaudere de presenti, ipsas litteras ac omnia et singula in eisdem contenta, quantum eos et quemlibet ipsorum tangit tangereque possit, revocare2 et graciose confirmare vellemus. Nos autem, predecessorum nostrorum vestigia insequentes, ipsorum supplicancium peticioni favorabiliter annuentes, volentesque dictis previlegiis, immunitatibus et libertatibus aliis, ipsis supplicantibus de dicto juramento Francie per dominos predecessores nostros Francorum [reges] prefatos concessis et, ut dictum est, [p. 148] confirmatis, ipsos uti et gaudere, predictas litteras ac omnia et singula in eisdem contenta, rata habentes, eas volumus, laudamus, approbamus, ratifficamus et de nostra speciali gracia, sciencia et auctoritate regia renovamus, ac eciam quathenus usi sunt, et ex ampliori gracia volumus et ipsis supplicantibus concessimus et concedimus ut ipsi et quilibet ipsorum, in signum dicte nostre specialis salve gardie, in et super terris, locis, grangiis, domibus, possessionibus, rebus et bonis suis quibuscunque, penuncellos seu baculos nostros regios per judices et officiarios nostros, in casu, eminentis periculi, apponi facere possint. Dantes, tenore presencium, in mandatis dilectis et fidelibus nostris gentibus nostrum presens, et que in futurum tenebunt Parlamentum, gentibus nostris compotorum, necnon senescallis, baillivis, prepositis ac eorum loca tenentibus, ac universis subditis regni nostri, omnibusque et singulis commissariis super premissis et ea tangentibus deputatis et deputandis, et cuilibet eorumdem, prout ad eum pertinuerit, quatinus dicta previlegia, libertales et immunitates, secundum formam et tenorem dictorum previlegiorum, teneant et observent, ac teneri faciant et observari, visis presentibus seu eorum copia, sub sigillo regio confecta, indilate, faciantque et permittant dictos operarios et monetarios dictis previlegiis et libertatibus, ac eciam concessione super dictis penuncellis, eisdem supplicantibus per nos facta, pacifice uti et gaudere, et ad hoc rebelles et inobedientes viriliter compellendo, factaque in contrarium, si que sint vel fuerint, ad statum pristinum reducendo. Quod ut firmum et stabile permaneat in futurum, nostrum presentibus litteris fecimus apponi sigillum. Datum et actum Parisius, in castro nostro Lupere, anno Domini millesimo ccc. lxxii. et regni nostri nono, mense septembris.

Per regem, in suis requestis. N. Gaignart.