CCCCXCIII

Karolus, etc. Gloriam mereri credimus et honorem, si predecessoribus nostris devotis regibus Francorum, qui fuerunt pii ecclesiarum fundatores, inherendo, ecclesiarum ipsarum statum pacificum observamus, circa en potissime que cultus divini augmentum concernunt et remedium animarum. Sane porrecta nobis Johanne, uxoris quondam Guydonis Odardi1, militis, nunc deffuncti, supplicacio continebat quod dictus deffunctus Guido in suo testamento seu ultima voluntate, pro sue et suorum animarum remedio et salute, voluit et ordinavit de bonis sibi à Deo collatis unam capellaniam fundari in ecclesia Sancti Vincencii de Oratorio, Pictavensis diocesis, et dotari de viginti libris turonensium annui et perpetui redditus, nobis supplicando humiliter nostram super hoc graciam misericorditer elargiri. Notum igitur facimus universis, presentibus et futuris, quod nos, attenta ipsius Guidonis pia devocione, quam in Domino commendamus, considerantes eciam [p. 52] grata et laudabilia servicia que longuo tempore in guerris nostris idem Guido nobis impendit, et ut missis, oracionibus ac aliis bonis que fient et dicentur in dicta capellania participes effici mereamur, volumus et concedimus per presentes, nostra auctoritate regia, certa sciencia et gracia speciali, ut dicta uxor dicti deffuncti Guidonis et ejus heredes vel causam ab ipso habentes pro ipsius capellanie fundacione et dotacione dictum redditum viginti librarum et res quascumque inmobiles ad valorem ejusdem personis ecclesiasticis dare et concedere et in ipsarum manus dimittere, cedere et transferre, quodque capellanus qui primo in dicta capellania fuerit canonice institutus et ejus successores hujusmodi redditum viginti librarum turonensium aut res immobiles ad valorem, ut prefertur, cum sibi tradite, translate et dimisse fuerint, extra tamen feudum et justiciam, tenere perpetuo et possidere valeant pacifice et quiete, absque eo quod per nos vel successores nostros, aut nostrorum vel ipsorum officialium, ad dimittendum dictum redditum aut extra manum suam ponendum de cetero aliqualiter cogi possint. Nostram insuper graciam ampliantes, omnem financiam nobis et successoribus nostris propter hoc debitam, ad quamcunque summam ascendat, licet non sit presentibus expressata, ipsius Guidonis uxori et causam ab eo habentibus vel habituris, consideracione premissorum, quittamus et perpetuo remittimus atque damus. Dantes, tenore presencium, in mandatis dilectis et fidelibus gentibus Camere compotorum nostrorum ceterisque justiciariis nostris, presentibus et futuris, et eorum loca tenentibus, et cuilibet eorumdem, quatinus dictam uxorem quondam dicti Guidonis, vel ejus causam habentes et habituros, nostra presenti gracia et concessione uti et gaudere faciant et permittant, ipsos vel eorum alterum, occasione alicujus financie habende vel aliàs, in contrarium nullatenus molestando. Quoniam sic fieri volumus et concessimus, usu, stillo, statutis, ordinacionibus dicte [p. 53] camere ac aliis in contrarium edictis non obstantibus quibuscunque. Quod ut fìrmum, etc. Salvo, etc. Datum Parisius, in nostro hospicio prope ecclesiam Sancti Pauli, mense marcii anno Domini m° ccc° lxix°, et regni nostri sexto.

Per regem in suis requestis. J. Vernon.— Visa. Chanac.