DXXXIV

Charles, par la grace de Dieu roy de France. Savoir faisons à tous, presens et avenir, que, comme par le traictié et accort nagueres fait par nos très chiers et très amez le duc de Berry et d'Auvergne, conte de Poitiers, Engoulesme et Xaintongne, nostre lieu tenant ès dis païs, et le duc de Bourgongne, nostre amé et feal connestable et nostre amé et feal le seigneur de Cliehon, et autres de nos gens, avec les prelaz, gens d'esglise, barons et autres nobles des dis païs de Poitou et de Xainctonge, pour eulx et leurs alliez et subgiez, sur le fait et pour la cause de leur venue et retour en nostre obeissance, toutes les terres, possessions, rentes, revenues et heritages des dis prelas, gens d'esglise, barons. [p. 200] nobles, bourgois et autres habitons quelconques des païs de Poitou et Xainctonge dessus dis, ou de leurs predecesseurs, lesquielx nous, nos dis, freres, connestable, lieutenant ou autres quelconques avons donnez ou transportez à quelconques personnes que ce soit, leur doivent estre rendues, baillées, restituées et delivrées, et ycelles leur avons rendues, restituées et délivrées à plain, non obstans quelconques dons ou transpors fais d'iceulx à quelconques personnes et pour quelconque cause que ce soit ; et que semblablement toutes les terres, rentes, revenues, possessions, heritages d'aucuns de nos subgiez et de leurs predecesseurs, et qui ont tenu nostre parti depuis la guerre commenciée entre nous et nostre adversaire d'Angleterre, qui par nostre dit adversaire, ses fils, ses lieuxtenans ou officiers ont esté donnez ou transportez en aucuns de leurs alliez, qui ont tenu leur parti durant la dicte guerre, seront rendus, restituez et delivrez à nos dis subgés qui ont tenu nostre parti, comme dit est, non obstans quelconques dons fais d'yceulx à quelconque personne et pour quelconque cause que ce soit, si comme ou dit traictié est plus à plain contenu ; et il soit ainsi que nostre dit adversaire, le prince son filz ou autres ses lieuxtenans ou officiers aient donné ou transporté les terres, rentes, revenues, possessions et heritages de feu maistre Jehan Boschet, le quel estoit nostre vray subget et bien veillant et le firent mourir senz cause, à Parceval de Culoigne1 et autres, les [p. 201] quielx, par vertu des dis dons ou autrement, de fait et de leur volenté, detiennent et occupent les dictes terres, rentes, [p. 202] revenues, possessions et heritages du dit feu maistre Jehan, les quielz dons ou aucuns d'iceulx leur ont esté, si comme [p. 203] l'en dit, confermez par nostre dit frere de Berry ; et les quielx heritages appartiennent et doivent appartenir, à cause [p. 204] de succession hereditaire, à nostre amé et feal clerc et conseillier maistre Pierre Boschet, Jehan, Aymer et Maurice Boschés freres, neveus du dit feu maistre Jehan Boschet, et aus quelx il doivent estre rendus, restituez et delivrez, comme à eulx appartenans, si comme dessus est dit ; nous à yceulx maistre Pierre, Jehan, Aymer et Maurice Boschez, freres, et à chascun d'eulx, pourtant comme il li puet touchier et appartenir, avons rendu, restitué et delivré, et par ces presentes, de nostre plaine puissance et auctorité royal, de certaine science et de grace especial, leur rendons, restituons à plain toutes les dictes terres, rentes, revenues, possessions et heritages du dit feu maistre Jehan, leur oncle, quelconques il soient et où qu'il soient assiz, et voulons que il en joissent comme des leurs propres, ainsi comme faisoit le dit feu maistre Jehan au temps qu'il vivoit, non obstans les dis dons fais d'yceulx au dit Perceval, et autres par nostre dit adversaire, ses filz, lieux tenans ou officiers dessus dis, les quielx nous declarons et decernons avoir esté et estre nulz et de nulle valeur, et les revocons, cassons et adnullons, se mestier est, avec tout ce qui se en est ensui, et aussi non obstans la dicte confirmacion ou [p. 205] confirmacions, dons ou octrois fais ou à faire au dit Perceval et autres par nostre dit frere de Berry ou autres, les quielx, et tout ce qui s'en est ensui, nous avons revoqué et rappellé, revocons, rappellons et mettons au niant, et ne voulons yceulx avoir eu ne avoir aucun effect, en quelque voie ou maniere que ce soit. Si donnons en mandement au seneschal de Poitou, à tous nos justiciers et officiers, ou à leurs lieux tenans et à chascun d'eulx, et commettons, se mestier est, que les terres, rentes, revenues, possessions et heritages dessus diz facent tantost et sans delay, ces lettres veues, bailler, rendre, restituer et delivrer auz dis maistre Pierre, Jehan, Aymer et Maurice, ou à leur certain commandement, et d'iceulx et des proufis et levez et emolumens d'iceulx les facent et laissent joir et user paisiblement dores en avant, sens leur faire ou souffrir estre fait en ce destourbier ou empeschement aucun, le quel, se il treuvent estre mis, l'ostent et le facent oster et remettre au premier estat deu, et avec ce contraignent ou facent contraindre, par toutes voies et manieres deues, les dis occupeurs et detenteurs des dis heritages, possessions, rentes, revenues et terres, et chascun d'eulx et tous autres à yceulx baillier et delaissier, rendre et restituer et delivrer aus dis freres, et à cesser de tous empeschemens que il li ont mis et mettront ou temps avenir, non obstans quelconques opposicions ou allegacions et appellacions frivoles, et lettres subreptices à ce contraires. Et que ce soit ferme chose et estable à tousjours, nous avons fait mettre nostre seel à ces presentes. Sauf en autres choses nostre droit et l'autrui. Ce fu fait et donné à Paris, en nostre chastel du Louvre, le xv^e jour de decembre l'an de grace mil ccclxxii. et de nostre regne le ix^e2.

Par le roy. G. de Montagu.