DXXI

Charles, par la grace de Dieu roy de France. Savoir faisons à tous, presens et avenir, de la partie de Jehan Brumen, nostre sergent d'armes, nous avoir esté signifié que, environ la feste de la Nativité nostre Seigneur l'an de grace mil ccc. lxx, Guillaume Morfouace1, Jaquet le Bouchier et le dit exposant, maistres de trois barges [p. 144] d'armée ès parties de Bretaigne vers Fille de Bast, là où il estoient alez, en entencion de grever nos ennemis, prindrent une nef appellée Corpesaint que par la mer l'en amenoit du royaume de Portugal, en la quelle nef estoient et furent par eulx trouvez Jamet Labourie, Jehan de Canigo, les enfans de Lorgeril, Gautier de Mes, Manin Quatriex, Jehan Bonin et pluseurs autres, avec certaine quantité de vins, de billon et d'autres choses, et ycelle nef et choses qui dedens estoient menerent en l'ille de Brehac, en la terre de nostre très chiere cousine la duchesse de Bretaigne2, en la quelle isle [par] Jamet, Manin et autres dessus nommez fu opposé la dicte prinse avoir esté et estre mains deuement faite, pour ce [que] ilz se disoient noz subgès et bien vueillans. De la partie d'iceulx exposans Guillaume et Jaquet fu respondu que le roy de Portugal, de quel royaume la dicte nef venoit, estoit lors ennemi de nostre très chier cousin et bien vueillant le roy d'Espaigne, et allié à Edouart d'Angleterre, nostre ennemi ; aussi en la dicte nef n'avoit aucune chartre partie, par la quelle apparoir peust dont il amenoient la dicte nef, ne où il la vouloient mener, et par ce [estoit] vraie presumpcion que ilz l'avoient emblée ou pilliée, et avec ce, supposé que les dis Manin, Jamet et autres dessus nommés, exepté le dit Jehan Bonin qui en la dicte nef avoit xvii. tonnaux de vin, fussent nos subgez et bien vueillans de nous, toutevoiz avoient il mis et acompaigné avec eulx le dit Jehan Bonin, nez d'emprès [p. 145] Poitiers3, et lors demourant en la ville de la Rochelle, que lors occupoit Edouart de Gales ou ses gens, dont s'ensuioit le dit Jehan Bonin estre nostre ennemi ou rebelle, et par ce la dicte prinse avoit esté et estoit justement faicte, et finablement après pluseurs altercacions fu accordé entr'eulx que, parmi certaine quantité de vins et somme d'argent, qui lors par les dis maistres furent baillés realment et de fait aux dis Jamet, Manin et autres leurs consors, dont dessus est faite mencion, yceulx Jamet, Manin et autres dessus nommés quicterent et quicte clamerent à tous jours les dis maistres de la dicte prinse et des vins, billon, nef et marchandises que il prindrent et eurent par devers eulx, et en approuvant la dicte prinse avoir esté justement faicte, promistrent à non venir contre la dicte quantité, ainçois s'obligerent à leur garantir vers tous et contre tous, si comme par certain instrument sur ce fait peut apparoir ; mais ce non obstant, les dis Manin Quatriex, Gautier de Mez et autres ont trait en cause le dit exposant, pour raison de leurs biens et marchandises que ilz dient avoir esté prins en la dicte nef, et des dommages et despens que ilz se dient y avoir pour ce souffers, et contre lui s'efforcent de faire proceder criminellement, combien que il n'ait pas deservi estre ainsi traictié, attendu ce que dit est, [p. 146] sy comme il dit, suppliant, comme contre nos ennemis il nous ait loyalment et longuement servi en nos guerres, tant par mer comme par terre, nous sur ce lui vueillons eslargir nostre grace. Nous adecertes au dit exposant le fait dessus dit et toute peine et offense corporelle, criminelle et civile que pour ce puet avoir encouru envers nous, lui avons remis, quicté et pardonné ou dit cas, remettons, quictons et pardonnons, de certaine science et grace especial, et aus païs, à sa bonne renommée et à ses biens quelconques le restituons, en imposant sur ce silence perpetuel à nostre procureur ou procureurs, sauf toutevoies le droit de partie adverse à poursuir civilement. Pour quoy nous donnons en mandement à nos amez et feaulx amiral et visamiral, et à tous nos justiciers, officiers et subgès, ou à leurs lieux tenans et à chascun d'eulx, si comme à lui appartendra, que le dit exposant facent et sueffrent joir de nostre presente grace, et au contraire ne le molestent et ne sueffrent estre molesté comme que ce soit, et ses biens pour ce prins, saisis, levez ou arrestez lui mettent ou facent mettre à pleine delivrance. Et pour ce que ce soit ferme chose et estable à tous jours, nous avons fait mettre nostre seel à ces presentes lettres. Sauf nostre droit en autres choses et l'autrui en toutes. Donné au bois de Vincennes, ou mois de septembre l'an de grace mil ccc. lxxii, et de nostre regne le ix^e.

Par le roy, en ses requestes. Henry.