DXIX

Charles, par la grace de Dieu roy de France. Savoir [p. 135] faisons à tous, presens et avenir, nous avoir veu les lettres de nostre très chier et amé frere le duc de Berry et d’Auvergne, conte de Poitiers et nostre lieutenant ès dis païs et en pluseurs autres, sainnes et entieres, seellées de son seel en las de soie et en cire vert, contenans la fourme qui s’ensuit :

Jehan, filz de roy de France, duc de Berry et d’Auvergne, conte de Poitiers1, de Masconnois, frere et lieutenant [p. 136] de monseigneur le roy ès dis païs et en pluseurs autres. Savoir faisons à tous, presens et avenir, que, pour consideracion et en remuneracion des bons et aggreables services que Jehan le Page et Guillaume Regnant2, secretaires de nostre très chier et bien amé Bertran de Guesclin, duc de Mouline, connestable de France, ont fais à mon dit seigneur et à nous en la conqueste des païs de Guienne, de Poitou et de Xantonge, nouvellement faite, si comme de ce nous sommes souffisanment enformez, nous, de nostre certaine science et grace especial, et de l’auctorité et puissance royal dont nous usons, à yceulx Jehan et Guillaume avons donné et octroié, et par la teneur de ces presentes lettres, donnons et octroions les [p. 137] manoirs ou herbergemens de la Forest Nesdeau, de Vis, de Belhousme3, de Fontenay avec leurs appartenances, que souloit tenir feu messire Robert de Grantonne, jadis prestre, receveur de Poitou pour nostre ennemi d'Angleterre ou son filz, et tous les biens, tant meubles comme heritages, que le dit feu messire Robert, tant en son nom comme ou nom de Guillaume Yves, son nepveu, filz de sa suer, avoit acquises, et que ilz avoient et avoir povoient conjointement et diviseement ès dictes contez de Poitou et de Xantonge, tant herbergemens, maisons, cens, rentes, devoirs en blez, en vins et en deniers, desmes, vinages, terrages, homages, feages, justices, juridicions, seignouries haultes, basses, moiennes, avec quelconques leurs domainnes, vignes, terres, prez, pastures, boys, hayes, arbres chargeans et non chargeans, estans, eaues, garennes, en eau et en terre, moulins, coulombiers, comme quelconques autres choses, comment que elles soient nommées, devisées ou appellées en quelconques lieux, fiez, arrerefiefs, parroisses, justices, juridicions et seignouries, que ycelles choses soient assises, non obstant que elles ne soient declairiées en ces presentes, jusques à la valeur et estimacion de deux cens cinquantes livres de rente ; c'est assavoir à assiete et coustume de païs, où les dictes rentes sont assises, à avoir et tenir par les dis Jehan et Guillaume, et leurs hoirs, et de ceulx qui auront leur cause perpetuelment par heritage, c'est assavoir à chascun d'eulx la moitié des diz biens, pour en faire dores en avant toute leur plaine volonté, comme de leur propre chose à eulx acquise par droit heritage ; les quelles choses sont forfaites, confisquées et acquises à mon dit seigneur et à nous, par ce que les dis messire Robert de Grantonne et [p. 138] Guillaume Yves, son nepveu, estoient nez de la nacion et du païs d'Angleterre, et tenans le party du roy d'Angleterre et de ses adherens, ennemis de mon dit seigneur et de son royaulme. Si donnons en mandement aux seneschaulx de Poitou et de Xaintonge, et à tous les autres justiciers, officiers et subgès du roy, mon dit seigneur, et de nous en celles parties, et à chascun d'eulx, si comme à li appartendra, que les diz Jehan et Guillaume, ou leurs deputez sur ce ou nom d'eulx ils mettent ou facent mettre en saisine et possession des dictes choses et de chascune d'icelles, et les en facent joir royaulment et de fait, la quelle chose nous voulons ainsi estre faite, et à yceulx Jehan et Guillaume le avons octroyé et octroions, non obstans quelconques ordenances, mandemens ou deffenses et lettres, ou autres dons impetrez ou à impetrer au contraire. Et que ce soit ferme chose et estable à tousjours, nous avons fait mettre nostre seel à ces presentes. Sauf en autres choses le droit de monseigneur le roy, le nostre et l'autrui en toutes. Données à Poitiers, le viii^e jour d'aoust l'an de grace mil trois cens soixante et douze.

Les quelles lettres et tout le contenu en ycelles nous aians fermes, estables et agreables, ycelles, tout ainsi comme elles sont contenues, specifiés et esclarcies ès lettres de nostre dit frere plus à plain, voulons, loons, greons, ratiffions, approuvons et par la teneur de ces presentes lettres confermons, et, se besoing ou mestier est, de nouvel les donnons aux dessus nommés Jehan le Page et Guillaume Regnaut, de nostre certaine science et grace especial, à avoir, tenir et possider les dictes terres, possessions et revenues quelconques, jusques à la valeur des deux cens cinquante livres de terre annuele et à l'assiete dessus dicte, par les dessus dis, leurs hoirs, successeurs et qui d'eulx auront cause perpetuelment, comme de leur propre chose, avec les biens meubles, comme [p. 139] dessus est dit. Si donnons en mandement aux seneschaulx de Poitou et de Xantonge, et à leurs lieux tenans presens et avenir, et à chascun d'eulx, comme à lui appartendra, que les dessus dis Jehan le Page et Guillaume Regnaut mettent en saisine et possession de toutes et chascunes les choses dessus dictes, circonstances et dependences d'icelles, jusques à la valeur et estimacion des deux cens cinquante livres de rente dessus dictes, et les en facent, seuffrent et laissent doresenavant, eulx et leurs hoirs joir et user paisiblement, tout selon la fourme et teneur des lettres de nostre dit frere dessus transcriptes. Et que ce soit ferme chose et estable à tousjours, nous avons fait mettre nostre seel à ces presentes. Sauf en autres choses nostre droit et en toutes l'autrui. Donné à Paris, le xii^e jour de septembre l'an de grace mil trois cens soixante et douze, et de nostre regne le neuf viesme.

Par le roy. J. de Vernon.