MCCV

Charles, etc. Savoir faisons à tous, presens et avenir, nous avoir receue l’umble supplicacion des parens et amis charnelz de Jehan Houlereau, chargé de femme grosse et de plusieurs petiz enfans, prisonnier detenu ès prisons de la Roche Servière, contenant que, puis aucun temps en ça, par povreté et neccessité en la quelle ledit Houlereau estoit tellement qu’il n’avoit bonnement de quoy nourir et entretenir sesdiz femme et enfans ne subvenir à ses neccessitez et affaires, et par temptacion de l’ennemy, icellui Houlereau de son auctorité print ou tenement de Romeffort six beufz qui estoient à Jehan Bouteron, de la Roussière, parroissien de Saint Denis de la Chevace, dont satisfacion fut faicte audit Boutheron qui l’en promist garentir. Aussi print ledit Houlereau de son auctorité une [p. 227] jument à la Bugnonnière en la parroisse des Essars, de laquelle fut aussi faicte satisfacion à cellui à qui elle appartenoit. Et neantmoins ledit suppliant, qui a sa dicte femme grosse d’enfant, moult marrie et adollée de ce que dit est, et ses diz enfans en si grant povreté qu’il leur convient de jour en jour mendier leurs vies, est èsdictes prisons detenu en grant povreté et misère et en voye de miserablement finer ses jours, mesmement par rigueur de justice qu’il doubte rigoreusement proceder contre lui, se nostre grace et misericorde ne lui estoit sur ce prealablement impartie, si comme il dit, humblement requerant icelle. Pour ce est il que nous, ces choses considerées, voulans misericorde estre preferée à rigueur de justice, audit Jehan Houlereau, en faveur et pour pitié de sa dicte femme et enfans, avons quicté, remis et pardonné, etc. Si donnons en mandement, par ces presentes, au seneschal de Poictou et à tous noz autres justiciers, etc. Donné à Poictiers, ou mois de juing l’an de grace mil cccc. cinquante et ung, et de nostre règne le xxix^e.

Ainsi signé : Par le roy, à la relacion du conseil. Machet. — Visa. Contentor. E. Froment.