MCCXVIII

Charles, etc. Savoir faisons à tous, presens et avenir, nous avoir receu l’umble supplicacion des parens et amis charnelz de Pierre Baut, escuier, filz de feu Guillaume Baut, en son vivant escuier, contenant que ledit deffunct estoit homme noble et de noble lignée et fut, en son vivant, en pluseurs voyages et assemblées à l’encontre de noz anciens ennemis et adversaires les Anglois, et mesmement au siège de Bourg1, qui fut mis par feu nostre oncle le duc d’Orleans derrenier trespassé ; lequel feu Guillaume Baut, [p. 263] vingt ans a ou environ, est alé de vie à trespassement, delaissé ledit Pierre Baut, son filz, en l’aage de cinq ans ou environ, lequel venu en aage compectant a servy pluseurs nobles du pays et a esté en garnison longtemps en la ville de Mirembeau en Xanctonge, pour resister à nosdiz ennemis qui lors occuppoient grant partie de nostre pays de Guienne, et s’est ledit Pierre tousjours depuis tenu en ladicte garnison soubz Jehan de Toutessan, escuier, seigneur de Champdolant2, cappitaine dudit lieu de Mirembeau, et jusques à ce que avons envoyé noz gens d’armes et de trait oudit pays de Guienne, pour la reduction d’icellui [p. 264] en nostre obeissance ; lequel Pierre, après ce que noz gens de guerre sont descenduz oudit pays, a esté retenu et mis en ordonnance par nostre amé et feal conseiller maistre Jehan Bureau, tresorier de France, soubz la charge duquel il estoit ; lequel Pierre nous a bien et loyaument servi oudit voyage à l’encontre de nos diz ennemis. Lequel estant au siège de Blaye3 fut très griefvement blecié ou visage, et depuis le recouvrement et reduction dudit pays de Guienne, comme estant en ordonnance, a esté retenu avec autres compaignons de guerre et mis en garnison à la garde de la place de Chastillon, en laquelle il est encores demourant. Lequel Pierre puis nagaires s’est trait audit lieu de Champdolent et illec a fiencé une femme ; mais pour ce qu’il ne vouloit faire ses nopces sans le faire assavoir à sa mère et autres ses amis, vint, la sepmaine devant la sainte Katherine derreniere passée, au lieu de Bertet, en l’ostel de son feu père, et ilec demoura trois jours ou environ ; pendant lequel temps parolles se meurent d’entre sa dicte mère et autres demourans audit hostel, de certains gaiges qui autresfoiz avoient esté prins par ung nommé Jehan Richart, demourant ou village de Beauregart près dudit lieu de Bertet, en la paroisse de Saint Ylaire sur l’Autize, comme soy disant collecteur de certaines tailles mises sus de par nous en ladicte parroisse. Lequel Pierre, voyant que lesdiz gaiges n’avoient point esté renduz, monta, le mercredi matin en ladicte sepmaine, sur son cheval, et print sa dague et espée, pour aler audit lieu de Saint Ylaire, et passa par ledit lieu de [p. 265] Beauregart. Auquel lieu il ne trouva pas ledit Richart en sa maison, mais en alant audit lieu de Saint Ylaire, trouva ledit Richart faisant ung fossé au long d’une pièce de terre. Lequel Pierre salua ledit Richart et lui demanda qu’estoient devenuz les gaiges qu’il avoit prins ou fait prendre en l’ostel de sa mère ; lequel Richart lui respondi qu’il n’en avoit que besongnier et qu’il ne savoit qui il estoit. Auquel Richart ledit Pierre dist qu’il les gardast bien et qu’il les rendroit, et les lui feroit rendre par justice, et que son entencion estoit de venir devers nous. Lequel Richart lui dist que pour lui il n’en feroit riens et qu’il ne le cognoissoit point et l’outraga de parolles, tellement que ledit Pierre lui respondit que, s’il ne cessoit à l’injurier, qu’il luy donneroit tel cop qu’il en seroit pire. Lequel Richart, sans autre chose dire, se print au corps dudit Pierre et print la poingnée de son espée ; lequel Pierre, qui ne savoit que vouloit faire ledit Richart, print sa dague et lui fist paour, sans autrement lui meffaire que lui faire lacher son espée ; mais ledit Richart, non content de ce, print la pesle dont il dreçoit et faisoit ledit fossé et d’icelle donna tel cop audit Pierre par les espaulles qu’il cheut de dessus son cheval à terre, et volt de rechief courir sus audit Pierre, mais il se leva hastivement et tira son espée et se deffendi dudit Richart, et en se defendant le bleça ung peu ou polse. Pour le bruit desquelz Richart et Pierre Baut, et aussi que ledit Richart cria à haulte voix « à l’aide », survindrent tantost après à son aide Loys et Jehan Bonneaux, frères, cousins germains dudit Richart, et Pierre François, dit de Villiers, demourant audit village de Beauregart ; lesquelz estoient embastonnez, c’est assavoir ledit Loys d’un voulant4 pour buissonner, et ledit Jehan Bonneau [p. 266] et Pierre François chacun d’un gros baston. Lesquelz coururent sus avec ledit Richart audit Pierre, auquel convint habandonner son cheval, et print la fuite vers l’ostel de sa mère, par où l’en va dudit lieu de Beauregart à Bertet. Lesquelz Bonneaux, François et Richart poursuivirent si fort ledit Pierre qu’il lui convint se gecter ès terres appartenans à Jehan Chauvigny dudit lieu de Bertet, en l’ayre ou court dudit Chauvigny, tirant à la porte de la dicte ayre qui couroit ou chemin publique, lequel chemin ledit Pierre avoit fourvoié et delaissé, cuidant estre avant que les dessus nommez à ladicte porte, pour seurement se rendre en l’ostel de sa dicte mère ; mais lesdiz Richart, Bonneaux et François furent aussi tost que luy à la porte de la dicte ayre, place ou court, et se mirent devant, tellement qu’il convint audit Pierre fermer ladicte porte et se targer d’icelle. Laquelle porte demoura entre ouverte pour l’empeschement que faisoient lesdiz Bonneaux et François et Richart, lesquelz furent ilec par aucun temps, assaillant ledit Pierre, auquel ilz donnoient pluseurs grans menaces ; pour quoy il n’osoit saillir de la dicte aire. Lequel Pierre estant ainsi en ladicte ayre et ladicte porte entre ouverte, et parlant par ladicte ouverture ausdiz Bonneaux et Richart, tenant son espée nue soubz son bras, la pointe par derière lui, ledit François vint par derrière en ladicte aire, cryant à haulte voix : « Je tiens le meurtrier ! » A laquelle voix, ledit Pierre qui ot paour se retourna pour regarder qui c’estoit qui le vouloit surprendre ; lequel François se gecta hastivement sur ledit Pierre et s’enferra de l’espée dudit Pierre en la cuisse, tellement que du cop qu’il donna contre la pointe de ladicte espée, il fist saillir le pomeau de la dicte espée contre la muraille, contre laquelle ladicte espée s’aferma tellement que la dicte espée passa oultre la cuisse dudit François ; par le moyen duquel cop ledit François perdist tout le sang et demoura ilec en la place, et deux heures [p. 267] après ala de vie à trespassement. A l’occasion duquel cas ledit Pierre, doubtant rigueur de justice, s’est absenté du pays et n’y oseroit jamais retourner, se nostre grace et misericorde ne lui estoient sur ce imparties ; humblement requerant que, attendu ce que dit est et que ledit Pierre est homme de bon fame, renommée et honeste conversacion, non actaint ou convaincu d’aucun vilain cas, blasme ou reprouche, et que ledit Richart et Bonneaux furent agresseurs et ne leur demandoit riens ledit Pierre, ne n’avoit eu paravant aucune hayne audit feu François, et que ledit Pierre n’a fait ledit cop à son aissient, etc., il nous plaise sur ce luy pourveoir de nos dictes grace et misericorde. Pour quoy nous, attendu ce que dit est, voulans misericorde preferer à rigueur de justice, audit Pierre ou cas dessus dit avons remis, quicté et pardonné, etc. Si donnons en mandement, par ces presentes, aux seneschaulx de Poictou, de Xanctonge, gouverneur de la Rochelle et à tous noz autres justiciers, etc. Donné à Poictiers, ou mois de decembre l’an de grace mil cccc. cinquante et ung, et de nostre règne le xxx^e.

Ainsi signé : Par le roy à la relacion du conseil. Burdelot. — Visa. Contentor. Daniel.