DCXXXI

Karolus, etc. Regalis providencia digne pensans merita fidelium subditorum, illos libenter extollit honoribus et prosequitur favoribus graciosis, qui morum honestate et aliarum virtutum meritis decorantur, ut et ipsi commodum et honorem inde se reportasse letentur et ipsorum exemplo ceteri similibus se conformant. Notum itaque facimus universis, presentibus et futuris, quod, cum Dyonisius Gilier1, qui ex innobilibus traxisse dicitur originem, hujusmodi moribus et virtutibus insignitur, prout plurium fide dignorum attestatur relacio, ipsum Dyonisium cum tota ejus prole et ejus posteritate utriusque sexus, de legitimo [p. 125] matrimonio nata et nascitura, de speciali gracia, certa sciencia et auctoritate nostra regia, et potestatis plenitudine, nobilitamus et nobiles efficimus per presentes. Volentes et decernentes ut ipse, cum dicta sua prole et posteritate, nobiles nuncupentur et pro nobilibus reputentur et habeantur ubilibet, in judiciis et extra, universisque privilegiis, honoribus et prerogativis quibus utuntur ceteri regni nostri nobiles, ipsi gaudeant et utantur. Ulterius concedentes eidem ut ipse suaque proles et posteritas masculina, de legitimo matrimonio procreata et procreanda, valeant, quando sibi placuerit, milicie cingulo decorari, feuda insuper et retrofeuda nobilia ubicunque in regno nostro acquirere, et acquisita tenere et possidere libere, prout ceteri nobiles regni nostri consueverunt et possunt facere, et proinde ac si ab inicio nobilis et ortus à nobilibus extitisset, et absque eo quod pro acquisitis et acquirendis hujusmodi seu pro nostra presenti concessione quamcunque financiam nobis solvere teneatur. Nos etenim dictam financiam, ad quemcunque valorem dici aut reputari posset ascendere debere, eidem Dyonisio, certis ducti consideracionibus, remisimus et remittimus de nostra gracia predicta, per presentes. Quapropter dilectis et fidelibus gentibus nostris compotorum nostrorum Parisius et consiliariis nostris super facto nostri domanii, et thesaurariis Parisius, universis insuper justiciariis nostri regni, presentibus et futuris, vel eorum loca tenentibus, et eorum cuilibet, prout ad eum pertinuerit, tenore presencium precipimus et mandamus quatinus dictum Dyonisium, suamque prolem et posteritatem predictam, et eorum quemlibet, nostra presenti gracia uti et gaudere pacifice faciant et permittant, ipsos aut eorum aliquem in contrarium non turbantes, constitucione, usu, stilo, consuetudine vel observancia, in contrarium editis vel edendis, non obstantibus quibuscunque. Quod ut firmum et stabile perseveret, sigillum nostrum presentibus litteris est appensum. Salvo in aliis jure nostro et in omnibus alieno. Datum apud [p. 126] Montemargi, x^m die augusti anno Domini millesimo ccc° septuagesimo nono, et regni nostri sexto decimo.

Per regem. Yvo.