[p. 229]

DCLXXIV

Rémission accordée à Nicolas Fouquerent, valet du curé de Saint-Avaugour au diocèse de Luçon, pour un meurtre.

  • B AN JJ. 126, n° 126, fol. 82 v°
  • a P. Guérin, Archives historiques du Poitou, 21, p. 229-231
D'après a.

Charles, etc. Savoir faisons à touz, presens et avenir, à nous avoir esté exposé de la partie de Nicolas Fouquerent, povre varlet que, comme cestuy an present, lui estant varlet du curé de Saincte Waubour ou diocese de Luçon, eust prins en une demaine et dangier du dit curé son maistre certaines bestes qui estoient à Guillaume Landerea, le quel n’avoit aucuns droiz de les y mettre, advint que en la prise des dictes bestes, debat se meut, car le dit Guillaume, meuz de mauvaise voulenté, touz eschauffez s’adreça contre le dit exposant et en li voulant rescoure et oster de fait les dictes bestes, le frappa d’un gros baston tellement que par lui ne failli pas que le dit exposant ne feust grandement bleciez et en voie de mort. Et lors le dit exposant, soy sentant ainsi feruz, prinst une pierre en soy deffendant, et en fery le dit Guillaume, et après le getta à terre atout les poins, et lui osta le baston dont il l’avoit feru, mais pendant ce qu’il le tenoit soubz soy, Jehanne Landerelle, mere du dit Guillaume, et un sien parent [p. 230] survindrent avec le dit Guillaume, contre le dit exposant, et ainsi qu’il se combatoient ensemble, le dit exposant en la presse et entreprisse getta un coup de baston dont il attaint d’aventure la dicte Jehanne, non pas en la cuidant ferir, mais en soy revenchant contre son filz et son dit parent qui le pressoient et se combatoient à lui, comme dit est, sanz ce que par ledit fait, il lui feist sanc ne plaie, et n’apparoissoit lieu où elle eust esté ferue, et sanz ce que contre elle il eust paroles contencieuses par avant, mais toutevoyes trois ou quatre jours après ce, la dicte Jehanne qui estoit très vielle et ancienne femme, et avoit esté malade demi an et plus, ala de vie à trespas. Pour occasion du quel fait le dit exposant, doubtant rigueur de justice, s’est absentez du lieu et n’y ose seurement converser, en nous humblement suppliant comme en touz autres cas il ait esté et soit de bonne vie et conversacion honneste, et que le fait dessus dit n’avint point de certain propos, mais en chaude cole et par cas de meschief, et aussi la dicte Jehanne, ou lit de la mort, dist et ordena que elle vouloit que le dit exposant n’en eust aucune villennie ou dommage, en disant que elle ne savoit se elle mouroit pour ce fait ou par viellesce et maladie que elle avoit, comme dit est, nous sur ce lui vueillons impartir nostre grace. Nous adecertes, ces choses considerées, le fait dessus dit et toute peine, offense et amende corporele, criminele et civile, que le dit exposant a et peut avoir pour ce commis et encouru ou cas dessus dit, et satisfacion faicte à partie premierement, se faicte n’est, li avons quictié, remis et pardonné, quictons, remettons et pardonnons, et à son pays, bonne fame et renommée et biens non confisquez restituons, de nostre auctorité royal et grace especial, par ces presentes. Par la teneur desquelles au seneschal de Xaintonge, gouverneur de la Rochelle, et à touz noz autres justiciers et officiers, presens et avenir, ou à leurs lieuxtenans, et à chascun d’eulz, si comme à lui appartendra, donnons en mandement que [p. 231] de nostre quictance et remission facent le dit exposant joir et user paisiblement, et se son corps ou aucuns de ses biens estoient ou sont, pour occasion de ce que dit est, pris, saisiz, levez ou detenuz, lui mettent tantost et sans delay à plaine delivrance. Et que ce soit ferme chose et estable à touz jours, nous avons fait mettre nostre seel à ces presentes. Sauf en autres choses nostre droit et l’autruy en toutes. Donné à Paris, ou mois de juíng l’an de grace mil ccc. iiiixx et quatre, et le quint de nostre regne1.

Par le roy, à la relacion du conseil. P. Milet.


1 Il y a une erreur dans cette date ; il faudrait juin 1384 et le 4e de notre regne, ou 1385 et de notre regne le 5e, le règne de Charles VI commençant au 16 septembre 1380.