MCCCCL

Loys, par la grace de Dieu roy de France. Savoir faisons, etc., nous avoir receu l’umble supplicacion de Pierre Gain, archier, et Notinet Couppé1, coustillier de la charge et compaignie de nostre amé et feal chevalier, conseiller et chambellan le sire de Crussol, seneschal de Poictou, prisonniers detenus en noz prisons de Poictiers, contenant que, le viii^e jour de ce present moys de decembre, ainsi que lesdiz supplians et feu Raymonnet Darmation, et deux femmes de chemin en leur compaignie, s’en retournoient du païs de Guienne, ainsi comme les autres, pour eulx en venir au logiz et garnison à eulx establiz par ledit seneschal, ilz arrivèrent au lieu de Voneul soubz Biart, auquel ilz se logèrent, ilz et leurs chevaulx ; et pour ce que au soir bien tart et après soupper, les diz supplians et ceulx de leur dicte compaignie ne povoient bonnement tous coucher en la maison où estoient leurs diz chevaulx, ledit feu Raymonnet se transporta, en ladicte heure, en l’ostel de feuz Guillaume Girart et Guillemin Girart, en son vivant franc archier, son filz, ausquelz père et filz, et autres dudit hostel, ledit Raymonnet en soy seant sur le banc dudit hostel, dist que on luy feist ung lit pour coucher et passer la nuit. A quoy luy fut respondu par ung jeune garson de leans que on ne luy en feroit point. Lequel Raymonnet, desplaisant de ladicte response, dist audit garson telles parolles : « Laisse parler ton père qui est plus saige que toy » ; et ainsi seant sur ledit banc, donna audit garson ung petit cop par la jambe du manche d’un vouge, sans luy faire [p. 135] playe ne sang. Après lequel cop, les diz père et filz et ung nommé Mathé, gendre dudit Guillaume Girart, et autres dudit hostel, eulx cuidans venger, prindrent, c’est assavoir ledit Guillaume ung gros baston et ledit Guillemin son espée, en courant sus audit feu Raymonnet, et luy cuidèrent donner plusieurs cops. Et lors ledit Raymonnet, ce voyant, issit hors dudit hostel et pour fouyr debat, s’en vouloit aler à sondit logiz. Et lors ledit Pierre, suppliant, qui avoit oy ledit debat, print son espée et s’en issit dudit logiz et rencontra ledit feu Raymonnet qui lui demande : « Où allez vous ? », et ledit Pierre luy enquist : « Quel debat avez vous ? » et ledit Raymonnet luy dist : « Ce n’est riens ; alons nous en nostre logiz. » Et adonc ledit Pierre, suppliant, dist qu’il aloit parler ausdiz Girars, ausquelz il dist telles parolles : « Alez vous en voz maisons, car il n’est nul besoing de faire debat meshuy. » Après lesquelles parolles, vint l’un d’iceulx Girars, qui d’un levier donna audit Pierre suppliant ung cop tellement qu’il le fit tumber à genoulx ; et lors icelluy Pierre dist : « Vous avez tort de me fraper, car je ne vous demande riens, et vous en feray venir devant monsieur de Poictiers, car je suis clerc. » Et incontinent ledit Girart franc archier, irrité de ce que dit est, vint à l’encontre dudit Pierre et de sadicte espée luy donna ung cop sur la main et le blessa au polce, et le luy eust couppé, s’il n’eust retenu ledit cop. Ce que oy par ledit feu Raymonnet, retourna vers ledit Pierre pour le secourir tenant et portant sondit vouge, et pareillement issi ledit Notinet en pourpoint et print sa dague en sa main, et vint audit debat, et d’icelle frapa ung d’iceulx Girars, ne scet lequel, ung cop, et ledit feu Raymonnet à l’arrivée de sondit retour rencontra ledit feu Guillemin, franc archier qui luy gecta une pierre, cuidant l’en fraper par la teste ; et aussi le cuida fraper de ladicte espée. Et à ceste cause ledit Raymonnet, en soy defendant, donna audit Guillemin ung cop de la hampe dudit vouge par l’estomac, [p. 136] et lesdiz supplians se combatoient toujours ce pendent avecques lesdiz Guillaume, Mathé et autres gens dudit hostel, tellement que audit debat ledit Pierre, suppliant, donna ung cop sur le bras dudit Guillaume, tellement que sondit baston luy cheut hors des mains et qu’il eut le bras presque couppé, et semblablement fut blecé ledit Mathé en la teste en deux ou troys lieux ; et ledit feu Raymonnet, en poursuivant toujours ledit feu Guillemin, franc archier, luy donna aussi deux ou troys cops de l’estoc dudit vouge en aucunes parties de son corps. A cause desquelz cops, iceulx Girars puis naguières sont alez de vie à trespas. Pour occasion desquelz cas, les diz supplians et Raymonnet furent constituez prisonniers en noz prisons dudit Poictiers, où iceulx supplians sont encores de present ; et depuis a esté ledit feu Raymonnet à ceste cause exequté par justice. Et dobtent lesdiz supplians estre en voye d’y finer miserablement leurs jours, etc., requerans, etc. Pour quoy, etc., ausdiz supplians avons quicté, etc. Si donnons en mandement au seneschal de Poictou, etc. Donné à Loches, ou moys de decembre l’an de grace mil cccc. soixante huit, et de nostre règne le viii^me.

Signé : Par le roy, les sires de Chastillon2 et de Fontaines3, et autres presens. De Moulins.