MDXXIII

Loys, par la grace de Dieu roy de France. A tous ceulx qui ces presentes lettres verront, salut. L’umble supplicacion [p. 374] de Pierre de Marvilleau, escuier, seigneur de la Vignoie1, [avons receue], contenant que v. ou vi. ans a ou environ, il estoit demourant avecques feue Marguerite de Rasillé, lors vefve de feu Anthoine d’Argenton2, chevalier, seigneur [p. 375] dudit lieu d’Argenton, durant lequel temps estoit fort accointé, famillier et en grace d’icelle de Rasillé ; et aussi estoit pour lors Loys Chabot, chevalier, seigneur de la Gresve3, fort famillier de ladicte Rasillé, et avoient ensemble grans communicacions et accoinctances. Et durant icelui temps, deux ans a ou environ, avint que, au moyen de certaine hayne que eurent ensemble lesdiz de Rasillé et de la Gresve, icelui suppliant sejourna ung jour, [p. 376] comme souvent sejournoit avec ladicte de Rasillé, et en parlant de plusieurs choses, icelle de Rasillé, commança à parler audit suppliant dudit Chabot, en lui disant qu’il n’estoit point homme qui lui deust porter les termes qui lui portoit, et qu’elle l’avoit bien servy et fait trop de plaisir et plus qu’elle ne devoit, dont elle sentoit sa consience chargée. A quoy ledit suppliant respondi ces motz ou semblables : « Madame, si vous avez fait chose contre Monsieur de Monsoreau4 qui ne soit à faire, il vauldroit [p. 377] mieulx, selon Dieu et vostre conscience, en dire et faire savoir audit de Monsoreau la verité. » Et adonc ladicte de Rasiglé lui en commança à conter comment autresfoiz en faveur dudit de la Gresve elle avoit fait emplir et escripre, au lieu de Champeigné sur Veude, en ung blanc signé de son feu mary et scellé du seel de ses armes une lettre par François Gibert5, laquelle ledit Gibert, après ladicte escripture, [p. 378] avoit signé, et l’avoit fait minuter, comme elle disoit, ledit de la Gresve par Thomas Gibourreau, son chastellain et officier, contenant, entre autres choses, que ledit seigneur d’Argenton, son feu mary, en recompence de certaines terres appartenans audit Chabot, qui autresfois avoient esté vendues par ledit d’Argenton ou ses predecesseurs, durant ce qu’ilz avoient l’administracion dudit Chabot et de ses biens, vouloit que ladicte terre d’Argenton demourast après son decès audit Chabot et qu’il …6 audit Gibert la cappitainnerie, sa vie durant ; de laquelle lettre ledit Chabot s’estoit aidé en certain procès qu’il avoit, en nostre court de Parlement, contre ledit de Moncereau (sic) et en avoit gangné sa cause. Après lesquelles parolles ainsi recitées et dictes par ladicte de Rasillé audit suppliant, elle le chargea de le dire et faire savoir audit de Monsoreau et qu’il le fist parler à elle, et qu’elle lui vouloit dire des choses touchant ladicte matière, ce que ledit suppliant fist peu de temps après. Et depuis les fist parler ensemble au lieu de Partenay, auquel lieu ilz furent par aucun temps et parlèrent ensemble, et croyoit le dit suppliant que ce feust de ladicte matière. Mais il ouyt que ledit de Monsoreau dist au deppartir qu’il faisoit venir ung commissaire pour veriffier ladicte matière et qu’il failloit que ladicte de Rasillé et ledit suppliant en depposassent devant lui, dont ilz furent contens. Et à ceste cause, fist ledit de Montsoreau venir ou païs nostre amé et feal conseiller en nostre court de Parlement, maistre Jehan des Feugeretz7, commissaire d’icelle pour interroger les dessus [p. 379] diz et autres touchant ladicte faulce lettre. Et quant ledit commissaire fut venu ou païs, icelui de Monsoreau manda audit suppliant qu’il convenoit qu’il depposast et que le commissaire estoit venu, et pour faire ses despens lui envoya cinquante escuz, lesquelz ledit suppliant print, et incontinent ala le dire à ladicte de Rasillé. Laquelle, pour ce que il8 avoit fait appoinctement avecques ledit de la Gresve, lui dist qu’il ne depposast riens, touchant ladicte faulce lettre, de ce que autresfoiz lui avoit dit ne chose qui feust contre ledit de la Gresve, et que si autrement il le faisoit, jamais n’auroit beau se trouver devers elle, et lui feroit perdre son argent qu’elle lui devoit, montant de huit cens à mille escuz, laquelle (sic) il lui avoit presté, et que, se il en diroit riens, elle le desadvoeroit et diroit que jamais ne lui en auroit parlé, et que pour tant il demourroit seul en son oppinion et depposicion et en pourroit cheoir en inconvenient. Et ce voyant, ledit suppliant, qui estoit fort jeune de sens et de aage, comme de dix huit à xx. ans ou environ, et qu’il estoit fort amoureux et prins de l’amour de ladicte de Rasillé, tellement qu’elle ne lui sceust riens commander ne dire qu’il ne le fist pour lui complaire, doubtant que s’il lui disoit chose qui lui feust desagreable, qu’il feust et demourast en son indignacion et perdit la grant acointance qu’elle avoit à lui, et aussi son argent qu’elle lui devoit, comme dit est, dont il n’avoit cedulle ne obligacion, et aussi qu’il demourast seul en sa depposicion, icellui suppliant qui estoit jeune, simple et ignorant et qui ne cuidoit aucunement mesprandre ne faire chose qui feust digne de reprehencion, à l’instigacion, pourchatz, requeste et enortement de ladicte de Rasillé, quant ce vint au jour qu’il devoit estre examiné par nostredit conseiller, commissaire dessus dit, n’osa dire verité de ce qu’il avoit autresfoiz dit audit de Montsoreau, [p. 380] et dist que bien avoit oy dire et parler de ladicte faulce lettre à gens de ladicte de Rasillé, mais ne sçavoit èsquelx ne de quoy elle parloit ; et oultre afferma que jamais ne l’avoit oy dire à ladicte de Rasiglé ne audit de la Gresve, et que ladicte de Rasiglé jamais ne lui en avoit donné charge d’en parler audit de Montsoreau, et si aucunement il en avoit parlé, ce avoit esté de la promocion, instigacion et requeste dudit de Montsoreau et par le moyen dudit argent qu’il lui en avoit envoyé et fait bailler. Laquelle depposicion nostre dit conseiller, commissaire susdit, rediga et fist mettre par escript. Et par autre commission obtenue par ledit de Montsoreau et à sa requeste, ledit suppliant fut de rechef interrogé par nostre amé et feal conseiller en nostre court de Parlement, maistre Jehan Chambon, nostre lieutenant en Poictou9, au lieu [p. 381] de Bresuyre, devant lequel se percevera en sa première dicte depposicion et se rapporta à ce qu’il en avoit dit devant ledit des Feugerrois, en disant semblablement qu’il avoit bien oy parler de ladicte faulce lettre, mais ne sçavoit à qui, et que jamais n’en avoit oy parler à ladicte de [p. 382] Rasiglé, et ne lui avoit donné charge en parler audit de Montsoreau, et que ladicte de Rasiglé estoit fine femme et qu’elle ne disoit point ces choses, si elle ne sçavoit bien à qui. Depuis lesquelles depposicions ainsi faictes par ledit suppliant, et après le trespas de ladicte de Rasiglé, il a [p. 383] esté de rechef interrogé sur ladicte matière, et considerant que èsdictes deux premières depposicions il avoit depposé contre verité et autrement que à point, tant par indiscreccion, esnortement et crainte d’encourir en l’indignacion de ladicte de Rasiglé, de laquelle il avoit esté fort acointé, que aussi de paour de perdre son argent, [p. 384] comme dit est, a dit et depposé la verité du cas et que la dicte de Rasiglé lui avoit dit et affermé les parolles dessus dictes, et lui avoit chargé les dire et notiffier audit de Montsoreau, et que depuis il les avoit fait parler ensemble, ainsi que dessus est dit. Depuis laquelle veritable depposicion ainsi par lui faicte, il a esté adjourné par ordonnance de nostre dicte court de Parlement à comparoir en personne en icelle court, à la requeste de nostre procureur general, à certain jour, auquel pour obeir à nous et à justice, s’est comparu et presenté en personne, et a esté de rechef interrogé, et a dit et depposé et affermé par verité toute sadicte derrenière depposicion estre veritable, et perceveré en icelle. Mais ce neantmoins, pour la variacion et contrarieté de sesdictes depposicions et qu’il s’est trouvé et trouve, par la derrenière d’icelle, qu’il avoit cellé verité en ses premières depposicions, il a esté arresté prisonnier en nostre ville de Paris, par ordonnance de nostre dicte court10, et doubte que l’en lui voulsist tenir rigueur [p. 385] de justice et proceder contre lui à quelque rigoreuse pugnicion, se nostre grace ne lui estoit sur ce impartie, en nous humblement requerant icelle. Pourquoy nous, les choses dessus dictes considerées, audit suppliant avons quicté et pardonné et par ces presentes, etc. quictons et pardonnons le fait et cas dessus dit, avec toute peine, amande et offence corporelle, criminelle et civille, en quoy pour et au moyen des diz cas il pourroit estre encouru [p. 386]envers nous et justice, etc., satisfacion faicte à partie, si aucune en y a interessée, civillement tant seullement, se faicte n’est, etc. Si donnons en mandement, par cesdictes presentes, à noz amez et feaulx conseillers les gens tenans et qui tiendront nostre dicte court de Parlement à Paris, et à tous noz autres justiciers, etc. que de nostre presente grace, quictance et pardon ilz facent, seuffrent et laissent ledit suppliant joir et user plainement et paisiblement, etc. Donné à Amboise, le xviii^e jour de may l’an de grace mil cccc. soixante treize, et de nostre règne le xii^e.

Ainsi signé : Par le roy, le sire de Roscur11 et autres presens. Tilhart.