CXCIV

Philippes, par la grace de Dieu, roys de France. A touz ceus qui verront ces presentes lettres, salut. Nous fesons savoir que comme nous par nos autres lettres aions commis au seneschal de Poitou et à maistre Conrrat de Crespi à ordener, cuillir et lever nostre subvencion novellement otroié en la dite seneschaucie, pour le fait de nostre guerre, en la maniere que elle est ordenée et que il est contenu plus plainement en noz autres lettres faites seur ce, nous entendons et voulons, pour le profit et l'avencement de la besoigne et pour plus eschiver le domaige de nos sougiez, et, par la teneur de ces lettres, commetons aus diz seneschal et Conrrat que il par eus ou par autres ordennent, [p. 12] cuillent et lievent la dite subvencion, selonc la fourme de nostre ordenance, en la dite seneschaucie de Poitou et en touz les ressorz de celle seneschaucie, quiex que il soient, ès quiex autres ne soient establiz de nous especiaument, avec nos demaines, des quiex il ont especial povoir par autres lettres. Et donnons en commandement à touz noz sougiez que il aus diz commissaires obeissent en ce diligemment. Donné à Paris, samedi après l'Ascension, l'an de grace mil trois cenz et quatre1.