[p. 397]

CCCXLII

Provisions de capitaine général en Poitou, Saintonge et Limousin, données en faveur de Pierre Flote, dit Floton de Revel.

  • B AN JJ. 77, n° 240, fol. 133
  • a P. Guérin, Archives historiques du Poitou, 13, p. 397-399
D'après a.

Philippes, par la grace de Dieu, roys de France. A touz ceux qui ces presentes lettres verront, salut. Savoir faisons que nous, confians à plain du senz, loyauté et diligence de nostre amé et feal chevalier, Floton de Revel1, sire d'Escole, ycelluy avons fait, ordonné et estably, faisons, ordenons et establissons, par la teneur de ces lettres, [p. 398] capitaine general et souverain de par nous ès parties de Poitou, Xantonge et de Lymosin, et ès lieux, marches et frontieres d'environ, li avons donné et donnons, par ces presentes, plain povoir, auctorité et mandement especial de faire cemonces, assemblées et chevauchées de genz d'armes à cheval et de pié, et de les mettre et recevoir à noz gaiges, de visiter les frontieres, les bonnes villes et chastiaux desdites parties, de ordenner et y meetre establies de genz d'armes et de pié, de vivres et d'autres choses qui y seront neccessaires, de tout et si grant nombre comme bon li samblera, pour la deffense et tuicion d'iceux, de muer et changer chastellains de lieu en autre, de souzpandre touz autres officiers des diz lieux, toutes foiz que mestiers sera, que il verra que à faire sera, de recevoir ou faire recevoir touz les deniers de noz receptes de Poitou, de Xantonge, Lymosin, de Berry et de Touraine, et touz les deniers aussi des imposicions, subsides et subvencions quelconques, à nous octroyés ès diz lieux, pour cause de noz guerres, les quiex devers nous voulons estre baillez et mis par devers lui par les receveurs ou colecteurs des diz lieux, non obstant quelconques assignacions faictes ou à faire sur les dictes receptes, imposicions ou subsides, ne quelconques ordenances, mandemens ou deffenses faites ou à faire au contraire, les quelles, se faictes estoient ores ne en temps avenir, nous dès maintenant les rappelions et mettons du tout au neant, de distribuer, paier ou assigner les diz deniers aus dites gens d'armes et de pié, qu'il aura dessous lui, et de faire les repparacions et garnisons des dites villes, chastiaux et forteresses, là où bon li semblera, de donner lettres d'estat à toutes manieres de gens, à cui elles devront estre données, de rappeler bannis et remectre et quicter toute paine criminele et civille qu'il pourraient avoir encouru envers nous, et aussy à touz autres qui seroient aprochez d'aucuns cas criminelz ou civilz par aucun ou aucuns de noz officiers et justiciers, ou de leur faire telle [p. 399] grace comme bon li semblera, les quiex rappel, remission ou grace nous, dès maintenant pour lors, avons agreables et yceulx voulons estre acompliz et enterinez, et pour ce qu'il soient fermes et estables, nous les confermerons par noz lettres, se nous en sommes requis, et generaument de faire toutes choses qui à office de capitaine doyvent et pevent appartenir, tout aussi comme se elles fussent expressement nommées en ces presentes, jasoit ce que elles requeissent mandement especial. Donnons en mandement, par ces presentes, à touz noz justiciers et subgès, receveurs, collecteurs et autres, que à nostre dit capitaine, ou à ses deputez, en faisant les choses dessus dites, donnent conseil, confort et aide toutes foiz qu'il les en requerront et mestier en auront. En tesmoing de ce, nous avons fait mettre nostre grant seel à ces presentes lettres. Donné au boys de Vincennes, le xe jour de juing, l'an de grace mil ccc. quarante huit.


1 Pierre Flote, dit Floton de Revel, fils aîné de Guillaume Flote, chancelier de France, et d'Alice de Mello (Voy. plus haut, n° CCCXX, p. 322, note). Il servit sous le connétable d'Eu, en Gascogne, puis en Flandre, de 1337 à 1340, et fut créé amiral de France par lettres du 28 mars 1345, charge qu'il exerça jusqu'au 19 octobre 1347, époque où il s'en démit. L'année suivante, au mois de mars, le roi le députa avec plusieurs autres de son conseil, pour faire un traité d'alliance entre Humbert, dauphin de Viennois, et Edouard, seigneur de Beaujeu. Le P. Anselme (Hist. généal., t. VII, p. 752) cite un acte du 10 décembre 1348, dans lequel Floton de Revel porte encore ce titre de capitaine souverain de par le roy ès parties de Poitou, Saintonge, Limousin, etc. Il mourut avant les fêtes de Noël 1350, laissant de Marguerite de Châtillon, sa femme, un fils, Guillaume II, seigneur de Revel. (Id., t. VI p. 276).