CXCV

Philippes, etc., à noz amés et feaux G. de la Rajace et P. de la Broce1, chevaliers, salut. Comme nous eussiens par nos autres lettres semons et requis et fait semonre et requerre touz les nobles des seneschaucie de Poitou et baillie de Touraine, de quelque estat que il soient, soient baron, chevalier ou escuier, que il fussent en chevaux et en armes aveques nous à Arras, à ceste prochaine feste saint Jehan, pour aler aveques nous en nostre besoigne de Flandres, et pour ce que nous ne poons veoir que nous peussiens avoir noz [p. 13] genz jusques à la quinzaine de la dite feste saint Jehan, pour ce que il se puissent miez pourveoir et arreer à nous servir en la dite besoigne, vous envoions en celes baillie et seneschaucie pour eus faire savoir nostre voulenté. Si vous commetons et mandons que vous ce leur faites savoir et les requerez et semonnez de par nous, si estroitement et si affectueusement comme vous pourrez, que il à la dite quinzaine, sanz nul defaut, arreé et apparelié en chevaux et en armes, pour venir aveques nous et nous servir en nostre dite besoigne, en telle maniere que nous leur en saichons gré et que par ce nous puissiens veoir leur bonne voulenté vers nous et vers nostre royaume. Donné à Vincennes, le jour de feste saint Barnabé l'apostre, l'an de grâce m. ccc. et quatre2.