CXCIX

Philippes, etc., au seneschal de Poitou. Comme nous vous avons escript par nos autres lettres1 que vous, tantost ycelles lettres veues, feissiez crier par arriere ban, par toute vostre seneschaucie et ès ressorz d'icelle, tant en noz propres terres comme en noz fiez, arrière fiez et ès terres de noz autres subgiez, que toutes manieres de genz tant nobles comme non nobles, tant de pié comme de cheval, de dis et huit anz jusques à sexante fussent à nous soufisanment appareliez en armes et en chevaus, chascuns selonc son estat, le jour de la Magdelaine prochaine venant, au plus tart, quelque part que nous soions, ès marches de Flandres, seur quanque il se pevent meffaire de corps et d'avoir, nous vous mandons que vous toute maniere de genz, qui par la teneur du dit arriere ban sont tenuz de venir en nostre ost, hastez de venir à nous au plus tost que vous pourrez, et en toutes manieres les contraignez à venir, gardée en toutes choses la fourme de noz dites lettres. Donné à Arraz, le mercredi ou jour de la Magdelaine, l'an de grace m. ccc. et quatre.