CXCVII

Philippes, par la grace de Dieu, roys de France, à nostre amé et feal Hugue Larcevesque, salut et amour. Autre foiz vous avons escrit et prié que, comme nostre entencion fust et soit d'aler en Flandres contre nos anemis et devions estre à la quinzaine de la saint Jehan à Arraz, nous pour causes de nouvel apparissanz nous somes partiz et meuz de Paris au jour que ceste lettre fu donnée pour aler vers les parties de Flandres hastivement, pour la cause dessus dite, nous vous prions et requerons sus l'amour, la foy et la fiance que vous avez à nous, que, toutes excusacions et dilacions arriere mises, vous hastez de venir à nous avec soufisant [p. 15] quantité de genz à cheval, en tele maniere que vostre venue, la quele nous atendons de jour en jour, nous puisse estre profitable à cest besoing, et nous à vous et aus vostres soions tenuz guerredonner. Et soiez certains que, quant nous serons à Arraz, nous ferons tant de monnoie envers vous qu'il vous devra bien soufire. Donné à Paris, le mercredi après la Nativité saint Jehan Baptiste1.