CCLXXXV

Philippus, etc. Clemenciam ad illos libenter extendimus et statum eorum liberali promovemus affectu, qui nos serviciorum exhibicione grata preveniunt et virtutum suffragiis digne sibi vendicant premia meritorum. Notum itaque facimus universis, tam presentibus quam futuris, quod, licet Johannes Guiberti, clericus, et Guillelmus, ejus frater, ex prohibitis copulis, de conjugato videlicet et solutis, ortum habuisse dicantur, nos attendentes quod, sicut relacio fide digna testatur, ipsi ad proborum immitanda vestigia ferventer intenti, sic affluunt ubertate virtutum quod hujusmodi geniture maculam sic eorum probitatis decore abstergit, ut eos attolli favoribus graciosis debitum reputamus ac propter ea et intuitu certi servicii nobis impensi, suis supplicacionibus annuentes, de certa sciencia et speciali gracia ac plenitudine regie potestatis, predictos Johannem et Guillelmum, de copulis predictis genitos, ad honores seculares actusque legitimos quoslibet, quoad temporalia tenenda, tenore presencium, legitimitatis titulo decoramus, hujusmodi geniture maculam, quoad premissa, penitus abolentes, et concedentes eisdem ac eorumdem alteri ut cum eis et eorum quolibet, tenore presencium dispensantes, de sciencia, potestate et auctoritate predictis, ut ipsi tanquam legitimi succedere valeant et succedant personis quibuscunque in bonis omnibus temporalibus, mobilibus et immobilibus, nobilibus et innobilibus, in quibus succedere de consuetudine vel de jure possent, si essent de legitimo matrimonio procreati, in quibus tamen non est jus alteri vel aliis jam quesitum, nisi per illos eis per justum [p. 205] titulum dimissum fuisset, et ea tanquam legittimi valeant jure successionis vendicare, adipisci, retinere et jure hereditario paciffice possidere et de ipsis disponere, tanquam successores seu heredes legitimi in eisdem, dum tamen aliud quam deffectus natalium predictis non repugnet, deffectu hujusmodi seu constitucione, statutis vel lege edictis, et consuetudine vel usu generali, vel locali, regni nostri ad hoc contrariis non obstantibus quibuscunque. Firmiter injungentes universis et singulis justiciariis regni nostri, presentibus et futuris, ne quis eos et eorum quemlibet, aut prolem suam, vel heredes, successores aut posteros suos in bonis quibuscunque acquisitis et acquirendis, seu undecumque obvenientibus, occasione deffectus natalium, predictos Johannem et Guillelmum impetere, turbare, seu molestare quoquomodo presumat. Et quia eorum merita promerentur ut ipsos gracia et benivolencia amplioribus prosequi debeamus, unde in se et suis se sentiant honoratos, ipsos et eorum quemlibet de potestate, gracia et sciencia supradictis nobilitamus et nobiles habiles facimus et reddimus ut milicie decoro singulo valeant illustrari, concedentes eisdem ut ipsi et eorum quilibet cum omni sua posteritate, tam procreata quam procreanda, in universis et singulis actibus, rebus, possessionibus, personis et bonis suis nobilitare possint et quacumque nobilitatis prerogativa cum aliis nobilibus regni nostri plenarie, libere et quiete, lettentur pariter et utantur, constitucione qualibet, edictis et consuetudine, vel usu, vel lege in contrarium non obstantibus quibuscunque. Quod ut firmum et stabile perseveret in futurum, presentibus litteris nostrum fecimus apponi sigillum. Salvo in aliis jure nostro et in omnibus quolibet alieno. Datum Parisius, anno Domini m. cccquadragesimo primo, mense augusto.

Per gentes Compotorum. G. de Bosco.

Finavit viii^xx. libras parisiensium redditas regi per thesaurarios ad Nativitatem Domini ccc xlj. Justicia.