CCXXV

Philippes, etc. A nostre amé et feal le viconte de Toart, salut et dilection. Vous savez la rebellion de noz desobeissanz et rebelles de Flandres et les granz desobeissances que il ont lonc temps faites et font de jour en jour contre nous et contre nostre reaume, ou grant grief et doumaige de tout le pueple de nostre reaume, et de nouvel monstrent que il ne leur souffist pas de desobeir, ainçois entendent affaire guerre ouverte contre nous, si comme il appert par leurs enseignes qu'il ont gitées hors et desploiées. Et pour ce avons, par deliberacion de nostre conseil, ordené à mettre entente et force, à l'ayde de Dieu, par nostre puissance et par la puissance de noz feaus et subgiez, à y pourveoir et venir encontre teles malices et rebellions, si que il soit en abaissement de si grant orgueil et de si grant presumpcion, [p. 67] et à l'onneur de nous et de noz feaus subgiez, et à la seurté de nostre reaume. Si vous requerons, mandons et commandons, si estroictement comme plus povons, par l'amour, la foi et la loyauté, en quoi vous estes tenuz à nous, à nostre royaume, et à la coronne de France, que vous, à la quinzainne de ceste prochainne Magdaleine, soiez à Arraz, en armes et en chevaux, appareilliez, garniz et arreez, selonc ce que faire le devez, et oultre avec ce en tele maniere que nous vous en doiens savoir gré, pour venir de là en nostre force et en nostre ayde, pour accomplir les choses dessus dites. Et ce faites en tele maniere que nous puissons par fait clerement appercevoir la bonne volenté que vous avez à nous. Données à Paris, le vii^e jour de juing l'an m. ccc. xix1.