CCCXXX

Philippus, Dei gracia, Francorum rex. Carissimo et fideli consanguineo et consiliario nostro Guidoni, comiti Forensi 1, salutem et dilectionem. De vestris fidelitate, probitate, diligencia, discrecione et industria plenarie confidentes, vos locum nostrum tenentem in senescalliis Pictavensi et Xanctonensi, et earum resortis, tenore presencium, facimus, constituimus et eciam ordinamus. Concedentes [p. 349] vobis ut auctoritate nostra possitis bannitos de regno nostro Francie ad patriam suam et regnum ipsum reducere et revocare, et ad statum et famam suam ac bona eorum restituere, et delictis et malefactoribus quibuscunque, quoquomodo et qualitercunque commisserint seu delinquerint, graciam facere, et delicta ipsa et penas propterea debitas eis remittere, prout videritis faciendum et eciam ordinandum ; consuetudines, usus et privilegia et statuta castrorum, villarum, seu locorum, ac singularum personnarum earundem, conjunctim vel divisim, confirmare, jurare, tenere ac eciam de novo concedere ; amortisaciones insuper et nobilitaciones, ac legitimaciones concedere et facere, absque eo quod à nostra camera Compotorum fìnancia exigatur ; nec non si gentes senescalliarum Pictavensis et Xanctonensis, et earum ressortorum, nobis rebelles, vobis, aut deputatis à vobis, obedire verbo vel facto noluerint requisiti, eosdem ceterosque inobedientes, si qui fuerint, ad obediendum vobis, viis et modis quibus videritis, compellere facere ; litteras status nobilibus et aliis personnis quibuscunque in servicio nostro in partibus, et illis quibus ad partes ipsas in servicio nostro venire contingent, dum tamen et quamdiu in eodem servicio nostro fuerint, à die qua iter ad dictum servicium nostrum arripuerint usque ad quindenam vel mensem post eorum abinde reditum, de causis et negociis suis, septis et non septis, bonis, rebus et debitis suis in statu manutenendis, absque invocacione quacunque vel aliter, prout vobis placuerit, concedere, patriamque et subditos refformare ; officiales nostros, tam majores, mediocres quam infimos, cujuscunque status existant, civiliter punire et corrigere, instituere et destituere, et de eisdem justiciam exigere, gentes ipsas partium illarum favore benivolo prosequi et ad nostram graciam, viis et modis quibus melius poteritis, reducere ; bona mobilia et inmobilia à nobis confìscanda, ad vitam vel hereditatem personis, quibus et [p. 350] quociens vobis expedire videbitur, dare et alias gracias facere et concedere, ас condempnaciones, penas multas et remissiones bannorum et aliorum forefactorum remittere, nec non omnia alia et singula facere, precipere et ordinare in omnibus et singulis casibus seu causis, tam super facto reformacionis quam alias, que nos faceremus, preciperemus et ordinaremus, seu facere, precipere et ordinare possemus, si presentes adessemus, eciam si illa mandatum exigant speciale, et majora essent quam superius exprimantur, excepta alienacione hereditatis nostre. Que omnia et singula per vos facta et facienda, rata et grata habemus et exnunc habere volumus, et faciemus, actore Domino, inviolabiliter observare, eciam et confirmabimus, ad cujus jus postulacionem (sic), sine difficultate quacunque, in quibus et ea tangentibus et dependenciis quomodolibet ex eis et quolibet eorumdem, vobis damus et concedimus plenam potestatem, et committimus totaliter, tenore presentium, auctoritate nostra et ex certa sciencia, vices nostras, Mandantes et precipientes, earumdem tenore presentium, omnibus et singulis, quacunque dignitate, auctoritate seu potestate, nostris eciam refformatoribus quibuscunque in illis partibus constitutis, senescallis, vicariis, ceterisque justiciariis, officialibus, thesaurariis, receptoribus et aliis subditis nostris regni nostri, ceteros amicos nostros requirentes, ut vobis, tanquam nobis et locum nostrum tenenti, pareant in premissis et qualibet premissorum et deppendenciis eorumdem efficaciter et intendant, prestentque vobis, sicut nobis, et faciant obedienciam, auxilium, consilium et juvamen. In cujus rei testimonium, presentibus litteris nostrum fecimus apponi sigillum. Datum Parisius, xviij^a die aprilis anno Domini millesimo ccc^oxlvij^o2.