CCLXXIII

Philippus, Dei gracia, Francorum rex. Dignum et racioni consonum arbitramur ut illi regie benignitatis affectu senciant se reffectos, qui per serviciorum exhibicionem utilium student se reddere nobis gratos, et alias sibi digne [p. 178] vendicant premia meritorum. Notum itaque facimus universis, tam presentibus quam futuris, quod, licet Johannes, Guillermus et Raymundus de Aux, fratres, ex copula detestanda, de pontifice videlicet in pontificali dignitate, gradu seu ordine constituto, et soluta ortum habuisse dicantur, nos, attendentes quod, sicut relacio fide digna testatur, ipsi ad proborum imitanda vestigia ferventer intenti, sic affluunt ubertate virtutum quod hujusmodi geniture maculam sic eorum probitatis decor abstergit, ut eos attolli favoribus graciosis debitum reputemus, ac propterea et intuitu certi servicii per eos nobis impensi, suis supplicacionibus annuentes, de certa sciencia et speciali gracia ac plenitudine regie potestatis, dictos Johannem, Guillelmum et Raymundum, de copula predicta genitos, ad honores seculares, actusque legitimos quoslibet, quoad temporalia, tenore presencium, legitimitatis titulo decoramus, hujusmodi geniture maculam quo ad premissa penitus abolentes ; et concedentes eisdem ac cum eis et eorum quolibet, tenore presencium, dispensantes, de sciencia, potestate et auctoritate predictis, ut ipsi, tanquam legitimi, succedere valeant et succedant personis quibuscunque in bonis omnibus temporalibus, mobilibus et immobilibus, in quibus succederent de consuetudine vel de jure, si essent de legitimo matrimonio procreati, in quibus jus non est alteri vel aliis jam quesitum, et ea, tanquam legitimi, valeant jure successorio vendicare, adipisci, retinere et jure hereditario pacifìce possidere, ac de ipsis disponere, tanquam successores seu heredes legitimi in eisdem, dum tamen aliud quam deffectus predictus natalium non repugnet, defectu hujusmodi, seu constitucione, statuto, vel lege, editis et consuetudine, seu usu generali vel locali regni nostri, ad hoc contrariis, non obstantibus quibuscunque. Firmiter inhibentes universis et singulis justiciariis regni nostri, presentibus et futuris, ne quis eos aut prolem suam, vel heredes, successores aut posteros suos in bonis quibuslibet, acquisitis [p. 179] vel acquirendis, seu undecunque obvenientibus, occasione defectus natalium predictorum Johannis, Guillelmi et Raimondi, impetere, turbare vel molestare quoquomodo presumat. Et quia prefati Johannis merita promerentur ut ipsum gracia et benivolencia amplioribus prosequi debeamus, unde in se et suis se senciat honoratum, eundem Johannem, de potestate, gracia et sciencia supradictis, nobilitamus et nobilem facimus et reddimus, ut milicie decoro cingulo valeat illustrari. Concedentes eidem ut ipse cum omni sua posteritate, tam procreata quam procreanda, in universis et singulis actibus, rebus, possessionibus, personis et bonis suis, nobilitate et quacunque nobililatis prerogativa, cum aliis nobilibus regni nostri, plenarie, libere et quiete letetur pariter et utatur, constitucione qualibet, edito et consuetudine vel usu in contrarium non obstante. Quod ut firmum et stabile perseveret, presentibus litteris nostrum novum fecimus apponi sigillum. Salvo in aliis jure nostro et in omnibus alieno. Actum Parisius, anno Dominim. ccc. quadragesimo, mense augusti.

Per dominum regem, ad relacionem gencium Compotorum. P. d'Aunoy.

Transiit mediantibus ii^e. libris parisiensium redditis regi per thesaurum, ad Nativitatem Domini ccc. xl. Justicia.