CCXXIX
Lettres d'amortissement d'une rente annuelle de trente livres donnée par Hugues Odart, évêque d'Angers, à l'abbaye de Saint-Maur-sur-Loire, sur différentes propriétés qu'il possédait à Bocé, et qui relevaient d'Aimery Odart, chevalier.
- B AN JJ. 60, n° 32, fol. 14
- a P. Guérin, Archives historiques du Poitou, 13, p. 70-72
Philippus, Dei gracia, Francorum et Navarre rex. Notum facimus universis, tam presentibus quam futuris, quod, cum ex parte dilecti nostri Hugonis Odardi1, Andegavensis [p. 71] episcopi, fuerit humiliter supplicatum ut ipse certas res hereditarias de ipsius proprio patrimonio existentes, sitas in castellania de Baugei in Andegavia, sub ressorto de Caynone, in parrochia de Bocé, in loco nunc vocato Changé et quondam Herbaut, quas idem episcopus ab Hemerico Odardi, milite, qui eas in paragio sibi servit, et idem miles cum pluribus aliis à nobis in fidem et homagium tenere dicuntur, pio motus affectu in religiosos viros, abbatem et conventum monasterii Sancti Mauri supra Ligerim in Andegavia, eorumque predictum monasterium, propter religiosorum ipsorum inopiam in presenti, sicut audivimus multipliciter desolatur, pro ipsorum et dicti monasterii relevandis neecessitatibus, ac eciam supportandis, in puram elemosinam transtulerit, seu transferre proponat, videlicet xiiij. libras reddituales in denariis, de quibus triginta solidi sunt in censibus et duodecim libre et decem solidi in tailliis, quas quidem quatuordecim libras reddituales debent plures minuti estagiarii, quidam in feodo dicti loci commorantes, quidam extra ; item sexdecim sextarios avene reddituales, quolibet sextario appreciato per assisiam iiijor solidos, valent sexaginta quatuor solidos ; item tres sextarios et minam frumenti reddituales, quolibet sextario appreciato sex solidos, valent xxi. solidos ; item unum sextarium et iiijor boissellos ordei reddituales, appreciatos quinque solidos et iiijor denarios ; item duo arpenta cum dimidio vinee appreciata valere redditus quatuor libras ; item quinque arpenta terre et dimidium arpentum prati appreciatum valere redditus quinquaginta solidos ; item tercerias que possunt valere per annum iii. pipas vini, appreciatas sexaginta solidos ; item domos dicti loci cum clausuris, appreciatas valere reddituales viginti quinque solidos ; item tres homines feodales ad premissa pertinentes, videlicet dominum de Villa Bonnay, dictum Graffini et dictum Machefer, de Mazé, racione uxoris sue, quolibet ipsorum homagiorum estimato valere quinque [p. 72] solidos ; quorum omnium est summa triginta libre et quatuor denarii annui et perpetui redditus ; ipsum redditum prefatis religiosis amortizare vellemus, intuitu pietatis et de gracia speciali. Nos autem prefati episcopi pium laudabileque commendantes propositum in hac parte, pro nostre parentumque nostrorum animarum salute, religiosis predictis, de speciali gracia, concedimus per presentes quod ipsi eorumque imposterum successores, dicti monasterii nomine, res predictas omnes et singulas, si jam in ipso sint translate vel cum translate fuerint, ex causa predicta, pacifice tenere possint et eciam possidere imperpetuum absque coactione vendendi vel extra manum suam ponendi, aut prestandi nobis vel nostris successoribus, Francorum regibus, aliqualem financiam pro eisdem. Quod ut firmum et stabile permaneat in futurum, presentibus litteris nostrum fecimus apponi sigillum. Salvo in aliis jure nostro et in omnibus alieno. Actum Parisius, anno Domini m. ccc. xx., mense februarii.
Per dominum regem. Barriere.
