[p. 375]

CCCXXXVI

Accord entre Isabelle de Parthenay, comtesse d'Harcourt, et Jean v, comte d’Harcourt, son fils, relativement à son douaire.

  • B AN JJ. 77, n° 153, fol. 77 v°
  • a P. Guérin, Archives historiques du Poitou, 13, p. 375-381
D'après a.

Philippes, etc. Savoir faisons à touz, presens et avenir, que, comme par devant nous, en nostre presence et en jugement, nostre amée et feale Ysabel de Partenay1, contesse de Harecourt, ait fait dire et proposer contre nostre [p. 376] amé et feal le conte de Harecourt2, son filz, que le dit conte, tantost après la mort de son pere, mari de la dite dame, estoit venus par devers elle, acompaigniez de grant foison de sages hommez et de genz de conseil, et par moult de paroles, voies et manieres, elle qui seule estoit et petitement acompaignie, et sanz conseil, plaine de doulour et de courrouz de son mari qui de nouvel avoit esté trespassez, avoit espoventée de perdre le tout, se elle ne se consentoit à ce que il vouloit et entendoit, et induite tant, que par accort elle avoit prins et accepté certain douaire et renoncié à tout autre douaire qui de droit et de coustume li povoit competer et appartenir, ja soit ce que plus grant assez li competast et appartenist, par coustume de pays, que cils qui baillé li estoit, et aussi avoit renuncié à son heritage, qui baillé li avoit esté par un certain eschange fait entre elle et son dit feu mari ; et avec ce fu enduite à renuncier aus meubles de son dit feu mari, qui grans estoient et montoient bien à dix huit mile livres, dont la moitié, par coustume de païs, li en doit appartenir ; des quelles renunciacions et choses dessus dites elle avoit passées lettres d’acort à son dit filz, et en ce avoit esté deseue enormement et oultre la moitié de juste pris. Si requeroit à grant instance que les dites lettres, renunciations et acort fussent rappelleez et mises au nyant, et que certain adjournement baillié et octroyé à la dite dame, par lequel la cause venoit en parlement, qui rappellez avoit esté par une impetracion torçonniere et subreptice faite de par le dit conte, leur fust bailliez et octroyez, et la lettre empetrée de par lui anullée. Et pour oster toute matiere de plait, offry en jugement et en nostre presence la dite mere plusieurs offrez au [p. 377] dit conte son filz, et entre les autres que, se son dit filz voloit jurer que il cuidoit et creoit que bien loyaument et justement il li avoit baillié et delivré, tant de son douaire, de son heritage, comme des meubles, ce que raison et coustume donnoit, il li plaisoit de tenir ce qui estoit fait et en vouloit estre contente, et se de ce le dit conte estoit refusant, la dite contesse nous requeroit à grant instance que sur toutes les choses dessus dites nous pourveissions de remede. Le dit conte proposant et disant à son desblasme, que des dites renunciacions et acort ce qui en avoit esté fait avoit esté fait à la requeste de sa dite mere et en la presence de pluseurs de ses amis charnels, et par leur conseil, c’est assavoir du vidame de Chartres, son cousin germain, de Jehan de Vendosme3 chevaliers, et de pluseurs autres sages et coustumiers du païs d’Anjou, du Maine et de Touraine, qui avec lui presens estoient et furent par intervale competant pour la conseiller sur ce, ainsy que quant le dit conte offry à sa dite mere que elle prist son douaire par toutes les terres et lieux où elle pooit et devoit prandre douaire, aus us et coustumes, ce ne sembla pas à elle, ne à ses diz amis, profitable, ainsois pour son plus evident profit desiroient et muex amoient que son douaire elle prist assembleement et par sa main, et pour ce firent le dit traitié et acort, sanz paroles espoentables ne inductions que le dit conte li fist ; et quant à l’eritage que elle disoit à lui appartenir à cause d’un certain eschange, au quel elle avoit renuncié, disoit le dit conte que, combien que du dit eschange eussent esté faites lettres entre elle et le dit feu conte, son pere, ce avoit esté pour la recompenser de certain heritage que elle devoit baillier du sien propre au et pour le mariage, qui avoit esté pourparlé et traitié du [p. 378] seigneur de Craon4 et de la fille de la dite contesse, si le mariage se faisoit, li quels mariages ne fu pas parfait, et pour ce demoura le dit eschange sanz effect et sanz perfection, et demourerent les diz conte et contesse ès saisines de leurs terres, sanz faire dessaisine aucune, et si ne devoit ne ne valoit ce qu’il faisoient ou prejudice de li, qui estoit heritier. Disoit oultre que sa dite mere avoit grant et souffisant douaire, et plus que par coustume de païs ne devoit avoir, ne ne se povoit dire deceue, car, combien que le feu conte de Harecourt, son mary, tenist grans terres, il en avoit grant foison venues et descendues par eschoite de costé, qui se montoient à plus de huit mile livres de terre, ès quelles elle ne pooit prandre douaire, si comme il apperoit de ce qui li estoit escheu de Guillaume de Harecourt5. Et plus disoit le dit conte que la dite contesse, sa mere, avoit mil et cinq cenz livres de douaire plus [que] Aalips de Brabant6, sa ayole, n’ot onques. Et oultre disoit le dit conte que la dite contesse, sa mere, après les acors dessus diz faiz et les dites lettres passées, avoit prins et accepté agreablement ce qui estoit contenu en l’acort et avoit jouy et possessé par un mois, par deux mois, par troiz mois, par quatre mois, sanz faire plainte ne clameur aucune, ne aleguer en jugement ne dehors que elle fust en aucune maniere deceue. Plus encore dit le dit conte que le dit offre à li fait par sa mere du serement dessus dit il prenoit [p. 379] et acceptait, et estoit prest de faire le dit serement lors presentement par devant nous.

Les quelles choses dessus dites et proposées d’un costé et d’autre oyes, nous feismes dire et demander à la dite contesse se elle se vouloit deporter ou non du serement du dit conte, son filz, la quelle respondy que non, mais nous requist et supplia que nous li feissions faire le dit serement. Le quel nous li feismes faire, touchées les sains euvangilles, et, en nostre presence, par ycellui serment aferma et dit que il creoit et cuidoit bien souffisanment et loyaument avoir baillié à sa mere, et pour douaire et pour heritage, tant comme il li povoit et devoit appartenir par raison et par coustume, et environ mile livres de terre oultre. Et parmi ce le dit conte nous requist que nous le absolissons des dites impeticions et demandes de sa dite mere, et feissions tenir et acomplir les dites lettres, convenances et acort. Et nous les dites parties ouyes, tout veu et consideré, et bon avis et deliberacion eus à nostre conseil, avons fait dire et pronuncier par arrest en nostre presence, et les dites parties presentes en leurs personnes, que le dit conte s’en yra quictez, delivrez et absols, et ycellui delivrons, quictons et absolons de l’impeticion et demandes dessus dites, contre lui faites par sa dite mere, et à ycelle imposames sur ce scilence perpetuel et les dites lettres d’acort pronunçons par ces presentes demourer en leur force et vertu, selon leur fourme et teneur, qui de mot à mot s’ensuit.

A touz ceulx qui verront ces presentes lettres, nous Ysabel de Partenay, contesse de Harecourt, et nous Jehan, conte de Harecourt et d’Aubmalle, viconte de Chastelleraut, salut. Savoir faisons que, par le conseil de noz amis et de pluseurs autres sages noz conseillers, o l’assentement de Louys de Harecourt7 chevalier, avons traitié et acordé sur [p. 380] les choses qui s’ensuient, en la fourme et maniere qui s’ensuit, c’est assavoir que nous conte dessus dit avons baillié, livré et assigné à nostre très chiere dame et mere, madame la contesse dessus dite, pour tout et tel douaire, comme elle peut avoir et demander de toute la succession qui nous est venue et descendue de nostre très chier seigneur et pere, le conte de Harecourt, que Dieux absoille, c’est assavoir les terres de Saint Pol le Viconte, de Saint Remi, de Paray et de Meninz( ?), et entierement o tout souais avec toutes les appartenances en bois, en forest, en yaues, en estans, en seignories, en demaines, en rentes et en toutes autres choses, et avec ce la viconté de Chasteleraut o toutes les apartenances entierement, sanz rienz retenir, à tenir et avoir de nostre très chiere dame et mere, par raison de douaire, le temps de sa vie durant tant seulement, franc et quicte le dit douaire de toutes charges et obligacions faites depuis le temps que feu monseigneur le conte de Harecourt vint à terre, exepté envers monsieur André de Chauviré et vers sa fame, en ce de quoy il sont en possession, ou donques assiete leur est encommanciée à faire, à exploiter les dites choses, baillées ainsi en douaire en la maniere que douaire doit estre exploictié, selon la coustume des païs, et ne poura avoir en la forest de Persaigne que troiz ventes à une foiz, en revenant le dit douaire à nous conte dessus dit, ou à noz hoirs, après la mort de nostre dite dame et mere. Et nous devant dite contesse congnoissons et confessons avoir prins et accepté les dites choses, pour tout et tel douaire comme à nous peut appartenir de la succession et descendue de nostre chier seigneur monseigneur le conte de Harecourt, en quelconques lieux et païs que les heritages de nostre dit très chier seigneur soient assis ; et avec ce congnoissons avoir promis et octroyé, et [p. 381] promettons à nostre très chier filz, le conte dessus dit, que nous ne poons ne ne pourrons, ou temps avenir, donner, vendre, eschangier, ne baillier aucune partie des choses immeubles, qui nous furent données et promises en mariage, c'est assavoir ce que nous en tenons à present et en ce qui nous esta venir, après la mort de nostre pere, et à descendre pour l'assiete de douze mile livres de rente à Saint Blançay et à Saint Christofle, et alieurs, à aucun de noz autres enfanz, en prejudice du dit conte ou de ses hoirs, par quelque voie que ce soit ou puist estre, retenu à nous toute la seignorie et proprieté de nostre dit mariage en toutes autres choses, à en faire nostre voulenté. Et à toutes les choses dessus dites tenir et loyaument garder, en chascun article, sanz venir encontre, nous, devant dite contesse, et nous, devant dit conte, et le dit Louys, en tant comme li touche, avons promis et [promettons] par la foy de noz corps et sur l'obligacion de touz noz biens meubles et immeubles ; presens et avenir. Et en tesmoing des choses dessus dites, nous avons fait seeller cestes presentes lettres de noz propres seauls. Ce fu fait et donné à Moncellain, le samedi après la feste saint Macé en septembre l'an mil ccc.quarante six8

Et que ce soit chose ferme et estable à touz jours, nous avons fait mettre nostre seel à ces presentes, en tesmoing des choses dessus dites. Sauf en autres choses nostre droit et en toutes l'autrui. Ce Fu fait et donné au bois de Vincennes, le tiers jour de novembre l'an de grace mil troiz cenz quarante et sept.

Par le roy, en son conseil, où estoient vous, messeigneurs Symon de Bucy9, J. Richier et pluseurs autres du conseil. Geneve.


1 Seconde fille de Guillaume VI Larchevêque, sire de Parthenay, et de Jeanne de Montfort, sa première femme, elle fut mariée, le 22 juillet 1315, à Jean IV, premier comte d’Harcourt, vicomte de Châtellerault, qui fut tué à la bataille de Crécy, le 26 août 1346. Elle vivait encore le 17 juin 1355. On conserve de cette date un curieux arrêt du Parlement rendu dans une affaire criminelle intentée par le procureur général, sur la plainte de Pierre Aymard, contre la dite dame et ses officiers de Châtellerault. Ceux-ci, ayant à leur tête Geoffroy de Villeneuve, chevalier, étaient accusés d’avoir envahi et pillé l’hébergement dudit Aymard à Saint-Remy-sur-Creuse, et d’avoir commis des actes de violence sur sa mère et ses gens (X2a 6, fol. 253).
2 Jean V, comte d’Harcourt et d’Aumale, vicomte de Châtellerault, capitaine de Granville, combattit vaillamment à Crécy. Ayant depuis encouru la disgrâce du roi Jean pour avoir pris part aux complots du roi de Navarre, il eut la tête tranchée à Rouen, le 5 avril 1355. Sa femme, Blanche de Ponthieu, comtesse d’Aumale, mariée en 1340, mourut le 12 mai 1387.
3 Jean VI, qui devint comte de Vendôme le 26 février 1353, à la mort de son père, Bouchard VI. Il fut fait prisonnier à la bataille de Poitiers et mourut à Montpellier au mois de février 1368. (Le P. Anselme, t. VIII, p. 727.)
4 Amaury IV, sire de Craon, de Sainte-Maure, de Chantocé, etc., lieutenant du roi en Poitou en 1351, fait prisonnier à la bataille de Poitiers, mort le 30 mai 1371, sans enfants, de Pernelle de Thouars, fille aînée de Louis, vicomte de Thouars, et de Jeanne, comtesse de Dreux. (Le P. Anselme, t. VIII, p. 570.)
5 Cinquième fils de Jean Ier d’Harcourt et d’Alix de Beaumont, il fut seigneur de la Saussaye et d’Elbeuf, maître d’hôtel du roi et queux de France, et mourut le 11 août 1337. (Id., t. V, fol. 128.)
6 Alix de Brabant, dame de Mézières, d’Arschot, etc., fille de Geoffroy, sire d’Arschot, femme de Jean III d’Harcourt, vicomte de Saint-Sauveur et de Châtellerault, mort le 9 novembre 1326. (Id, ibid., p. 130.)
7 Frère cadet de Jean, il fut gouverneur et lieutenant général en Normandie en 1360, charge qu’il conserva jusqu’en 1367 au moins, et mourut le 26 mai 1388 sans enfants.
8 Le 23 septembre 1346.
9 Premier président du Parlement de Paris, par ordonnance de 1344, négociateur du traité de Brétigny, mort en 1368.