CCCII

Philippes, par la grace de Dieu, roys de France. Savoir faisons à touz, presenz et avenir, que nous, consideranz des bons et agreables services à nous faiz par feu Guillaume Coindé, ou temps qu'il estoit nostre advocat en la seneschaucie de Poitou sanz gaiges, avons octroié et octroions par ces presentes, de grace especial et de nostre auctorité royal, à Jehan et à Guillaume Coindé1, ses enfans, freres, pour euls, leurs hoirs et successeurs en ceste partie, leur ardoir et usaige en nostre forest de Moliere, pour toutes choses neccessaires à leur harbergement appellé le Boys du Sé, en tant comme la cloisture d'icelui se peut estandre. Si donnons en mandement au verdier ou garde de la dite forest, qui hores est et qui pour le temps avenir sera, que les diz freres, leurs diz hoirs et successeurs en ceste partie ils facent et laissent, se mestier est, joir et user de leurs diz ardoir et usage à touz jours mais dores en avant, sanz [p. 276] contre dit en aucune maniere. Et pour que ce soit ferme chose et estable à touz jours, nous avons fait mettre nostre seel à ces presentes. Sauf nostre droit en autres choses et l'autrui en ceste et autres. Ce fu fait et donné à Villys en Champaigne, l'an de grace mil ccc. quarante et troys, ou moys de janvier.

Par le roy, en ses requestes. G. d'Erly.

Commandée puis à moy par le roy, le ix^e jour d'avril l'an xliiij., à Maubuisson. Verbrie.

Sine financia. Justice.