CCXLIV

Philippes, par la grace de Dieu, roys de France. Savoir faisons à touz, presenz et avenir, que, comme à la requeste de nostre procureur, eust esté amené prisonnier à Paris Guillaume Maingo, chevalier, sires de Surgieres1, pour la [p. 117] cause d'un forsage que l'en disoit que ledit chevalier avoit faist en la personne Phelippe Danielle, la quelle il avoit prise et ravie par li et par ses complices, et deflourée à force et contre sa volenté, assez prez de l'église de Menigouste, où elle estoit venue à la voille. Et encores disoit nostre dit procureur que le dit chevalier, si comme l'en disoit, avoit forcé pieça Margot, fille Perroteau, de Dampierre suz Voutonne, et une autre feme, appellée la.Bouteilliere, demorans à Surgieres, et s'estoit juz avecques elles [p. 118] charnelment à force et contre leur voulenté, si comme l'en disoit. Requerans sur ce nostre dit procureur, pour nous et en nom de nous, que, se le dit chevalier confessoit les choses dessus dites ou aucunes d'icelles estre vraies, il en feust pugniz en corps et en biens, ou autrement, selon ce que les cas le requeroient ; et se il le nyoit, nostre dit procureur, ou nom que dit est, en offroit à prouver tant qui li souffiroit à la fin dessus dite. Le dit chevalier nyant les faiz dessus declarez, proposans à sa deffense pluseurs raisons, justificacions et desblasmes ad fin d'estre quictés et delivrez et absoulz des choses dessus dites, à li imposées. Et après sur ce se soit trait par devers nous nostre amé et feal chevalier et conseiller, le sire de Partenay, auquel le dit chevalier est cousin et parent bien prez, si comme il dit, et nous ait moult humblement supplié que nous au dit chevalier feissiens grace, ad fin d'eschiver plus grans travaux ne escandele n'en peust estre aus amys du dit chevalier, ne à li meismes, nous le vousissons recevoir à finance ou composicion sur les diz cas, proposez contre li. Pour quoy nous, pour eschiver l'escandele de li et de ses amis, avons encliné ceste fois à la supplicacion du dit sire de Partenay, et avons receu et recevons le dit chevalier à finance et composicion de quatre mile livres parisis, les queles il nous a gagiées en la main de nos trezoriers, pour tant comme à nous puet touchier, sauf le droit d'autruy. Parmy la quele finance et composicion, nous avons le dit chevalier quicté et quictons des diz mesfais et les li remettons, et toute paine corporelle et autre, se en aucune estoit encheuz, tant comme à nous touche, et l'en avons absoulz, quicté et delivré et absolons, quictons et delivrons, en tant comme à nous touche, sauf droit d'autruy. Et, de nostre auctorité royal et grace especial, l'avons restitué et dès maintenant seur ce le restituons du tout à sa bonne et enterine fame, reservé à nous la dite finance, tele comme faite l'a, si comme dit est. Mandons à touz noz justiciers et [p. 119] subgiez, et à chascun d'eulz, que dores en avant sur les cas dessus dis ne le poursuient ne molestent en rienz, et que, se aucuns de ses biens meubles ou heritages estoient prins ne saisiz en nostre main pour les causes dessus dites, nous par ce que dessus est dit les li mettons au delivre. En tesmoing des quelles choses, nous avons fait mettre nostre seel en ces presentes lettres. Donné au bois de Vincennes, le XV^e jour d'aoust, l'an de grace mil ccc. trante et cincq.