CCLXXX

Philippes, etc. Savoir faisons à touz, presenz et avenir, que, à la supplicacion de nostre amé et feal cousin le conte d'Eu, connestable de France, toutes ses terres et liex, justices, [p. 191] fiez et ressors que il et la contesse, sa fame1, ont en la seneschaucie de Poitou, et qui avant la date de ces lettres avoient acoustumé à ressortir par devant nostre seneschal et par devant noz autres justiciers en autres chastellenies de la dicte seneschaucie, nous avons mis et mettons, de grace especial et de certeinne science, souz le ressort et du ressort de Poitiers, et volons que dores en avant il soient et demeurent souz le ressort et du ressort de Poitiers senz nul moyen, non contrestant que anciennement il aient ressorti autre part. Si deffendons par ces lettres à touz noz autres officiers et subgez des autres chastellenies de la seneschaucie de Poitou presenz et avenir que dores en avant il ne exercent ne facent exercer aucun fait de ressort ès dictes terres, justices, fiez et ressors, quar de toute leur jurisdicion et puissance nous les avons exemptez et eximons, de nostre dicte grace. Et commandons au dit senesehal de Poitou, present et avenir, que le dit ressort il tiengne et exerce et face tenir et exercer à Poitiers en la manière, devant dicte. Et pour ce que ce soit ferme et estable à touz jours, nous avons fait mettre nostre seel en ces lettres. Sauf en autres choses nostre droit et l'autrui en toutes. Donné à Estieules, l'an de grace mil ccc. quarante et un, ou mois de may.