CCXCIX

Philippes, etc. Savoir faisons à touz, presenz et avenir, que comme nous eussiens une piece de terre en la ville d'Angles, adjoignant du moustier d'icelle ville, la quelle ne nous vaut chascun an de rente que deux deniers et trois poitevines tournois, et pour ce que le cimitiere de la dite ville est une lieue loing de leur dit moustier, nous ont supplié les habitanz de la dite ville d'Angles que nous leur vousissiens [p. 266] donner les dites piece de terre et rente, et yceuls admortir, pour les quelles piece de terre et rente nous ont offert à fonder en leur eglise de la dite ville d'Angles une chapelle en l'honneur de saint Loys. Et nous qui en nostre temps voulons le devin service estre acreu, et aussi que nous et nostre très chiere compaigne, la royne, soions participans aus messes et bienfaiz qui en ycelle chapelle seront faiz, avons ou cas dessus dit donné et donnons par ces presentes, de nostre grace especial, de certaine science et auctorité royal, aus diz habitanz et à leurs successeurs habitanz de la dite ville d'Angles, à touz jours perpetuelment, les dites pieces de terre et deux deniers et trois poitevines tournois qui, pour ce nous estoient deuz de rente dessus dites. Et voulons que les diz habitanz tiengnent et aient ycelles terre et rente senz ce que euls ne leurs successeurs, habitanz de la dite ville d'Angles, soient tenuz à les mettre hors de leurs mains, ne à nous paier, ne à noz successeurs ou temps avenir, aucunne finance. Et que ce soit ferme chose et estable à touz jours perpetuelment, nous avons fait mettre nostre seel à ces presentes lettres. Sauf nostre droit en autres choses et l'autrui en toutes. Donné à Montpipiau, l'an de grace mil ccc. quarante et trois, ou moys de septembre.

Par le roy, en ses requestes. J. le Clerc.

Sine financia. Justice.