CCLI

Philippes, par la grace de Dieu, roys de France. Savoir faisons à tous, presens et avenir, que, comme pour ce que Estienne Hervé nous estoit tenuz en une certeinne somme d'argent, de la quelle il ne nous povoit satisfaire, nostre receveur de Tours ait fait mettre et crier en vente, pour nous poier de la dite somme, une maison que le dit Estienne avoit en la ville de Lodun, ou bourc Sainte Croiz, tenant, d'une part, à la maison feu Perrequin et, d'autre part, à la maison Estienne le Huger, mouvant du chapitre de Sainte Croiz de la dite ville de Lodun, et la dite maison n'ait esté ou ne puisse estre vendue que dix et huit livres tornois, nous, pour consideracion des bons et aggreables services que nostre amé et feal chambellan et chevalier, Robert Fretart1, nous a fait longuement et loyaument et fait chascun jour continuelment, avons donné et donnons par ces lettres, de grace especial et certaine science, pour nous et nos successeurs, roys de France avenir, à nostre dit chevalier et chambellan, pour li, pour ses hoirs et successeurs, et ceus qui auront cause de li, la dite maison, si comme elle se comporte et est ci dessus devisiée, avec ses appartenances, aus charges dont elle et ses dites appartenances sont chargées, tant en cenz comme autrement. [p. 133] Mandans par ces lettres à noz amez et feauz genz de noz comptes à Paris que les dites dix et huit livres il rabatent de la recepte et alloent ou compte de nostre dit receveur, et mandanz et commettanz au ballif et à yceli receveur de Tours, et à chascun d'euls, que la dite maison il baillent et delivrent sanz delay, avec ses dites appartenances, à nostre dit chevalier et chambellan, et l'en facent joir et user paisiblement et sanz aucun empeschement, non contrestant quelconques autres dons que nous avons fais ou temps passé à yceli nostre chevalier et chambellan. Et que ce soit ferme et estable à tous jours mes, nous avons fait mettre nostre seel en ces lettres. Sauf nostre droit en autres choses et l'autrui en toutes. Donné au bois de Vicennes, l'an, de grace mil ccc. trente et six, ou moys d'octobre.

Par le roy. Charolles.