CCLXXXI

Philippes, etc. A tous ceuls qui ces presentes lettres verront, [p. 192] salut. Comme nostre amé et feal, le seigneur de Parthenay, nous eust supplié que en sa ville de Peyré de Vouleure li vousissions octroyer marchié au lundi chascune sepmaine, et nous eussions mandé par noz autres lettres au seneschal de Poitou ou à son lieutenant que, appellé nostre procureur de sa seneschaucie et des gens du pais de environ, des quelz il appartiendroit, il s'enfourmassent diligemment du profit ou du dommage que nous ou autres pourrions avoir, se nous octroyons le dit marchié au dit seigneur de Partenay, et l'informacion que faite auroit nous renvoyast feablement enclose souz son seel, pour en faire ce que bon nous sembleroit ; et le dit seneschal ou son lieutenant, selon ce que mandé li avoit esté, se soit enfourmez bien et diligemment des choses dessus dites et nous ait la dite informacion feablement envoyé close souz son seel, la quele nous avons fait veoir et regarder, et il ait esté trouvé par mi la dite informacion que, se nous octroyons au dit seigneur de Partenay le dit marchié, ce sera le profit de nous, de lui et de tout le païs d'environ ; savoir faisons que nous, eu regart et consideracion aus choses dessus dites et aus bons et agreables services que le dit seigneur de Partenay nous a faiz et avons esperance qu'il nous face encores, avons octroyé et octroyons, de nostre plain povoir et auctorité royal, de certaine science et de grace especial, le dit marchié au lundi chascune sepmaine, audit seigneur de Partenay et aus siens pour touz jours mais, en sa dite ville de Peyré de Vouluyre, non contrestant que nous ayons autre foiz octroyé au dit sire de Partenay un marchié en sa ville de Besseleu et un autre en sa ville de Segondiney, ne graces ou dons que fait li ayons. Et donnons en mandement au dit seneschal ou à son lieu tenant qui à present est, et à ceuls qui pour le temps avenir seront, et à touz noz autres justiciers et officiers que il lessent le dit sire de Partenay et les siens dores en avant joïr et user paisiblement et sanz aucun empeschement [p. 193] du dit marchié, selon la fourme et teneur de nostre presente grace. Et que ceste chose soit ferme et estable à touz jours, nous avons fait mettre nostre seel en ces presentes lettres. Sauf nostre droit en autres choses et l'autrui en toutes. Donné à Saint-Germain en Laye, ou mois de may, l'an de grace mil trois cens quarante et un.

Par le roy, à vostre relacion. Franco.

Sine financia. Justice.