CCXLVIII

Philippe, par la grace de Dieu, roys de France. Savoir faisons à touz, presenz et avenir, que, pour le salut de nostre ame, nous avons donné et donnons en pure et perpetuelle aumosne, de nostre grace especial, aus prieur et freres de l'Ospital ou Meson Dieu de Montmorillon, pour le vivre et la soustenance des povres du dit lieu cinquante sestiers de blé, à la mesure de Montmorillon, assiz sur nostre disme de Lastus, en la paroisse de Lastus ; le quel blé puet valoir chascun an, au commun pris du païs, environ xij. livres et x. solz, à tenir et percevoir des diz prieur et freres et de leurs successeurs perpetuelment et paisiblement, sanz paier aucune finance, et sanz ce qu'il soient contrainz à les vendre ou mettre hors de leurs mains. Et nous donnons en mandement aus seneschal et [p. 129] receveur de Poitou, et à chascun d'eulz, que de la dite disme baillent tantost la saisine aus diz prieur et freres et les en facent joir paisiblement, et leurs diz successeurs, dores en avant ; et à noz genz des comptes à Paris que ycelle disme ostent de nostre demaine et en deschargent du tout les diz bailli (sic) et receveur qui sont à présent et ceus qui pour le temps avenir seront. Et comme de leur pure volenté, il nous aient octroié une messe du Saint Esperit, chascun jour, tant comme nous vivrons, et, après nostre decès, de Requiem, pour nostre chier seigneur et pere, que Dieu absoille, et pour nous, nous le dit octroy avons accepté et acceptons et les prions que les dites messes veillent dire ou faire dire en leur moustier, en la maniere que il l'ont gracieusement octroié. Et que ce soit ferme et estable à touz jours, nous avons fait mettre nostre seel en ces lettres. Donné à Plaisance, l'an de grace mil ccc. xxxv., ou mois de décembre.

Par le roy. Barriere