CCCX

Jehan, ainsné filz et lieutenant du roy de France, duc de Normandie et de Guienne, conte de Poitou, d'Anjou et du Maine. Savoir faisons à touz, presenz et avenir, [que], comme Agnès, jadis fame de Pierre de la Charité1, pour la fondacion d'une chapellenie assise en l'eglise de l'Aumosnerie de Sainte Marthe de Poitiers, pour faire le service divin et pour le salut et remede de l'ame de elle, ait donné perpetuelment et heritablement aus chapellains, presenz et avenir, qui deservent et deserviront la dite chapellenie cinquante et quatre soulz de rente annuel et perpetuel, c'est assavoir vint soulz quatre deniers tournois, assis sur une maison seant à Poytiers, ou bourc d'Anguitart, tenant d'une part à la maison qui fu feu Agnès de la Charité, et d'autre part à la maison à la Bugode ; item dix soulz sur la maison Alain le Breton2, assise en la rue de l'Erberie, tenant d'une part au four feu Pierre Alemant, et d'autre part à la maison qui fu Jehanne de Sainte Maune ; item vint et trois soulz huit deniers tournois sur une maison seant ou Marchié viel, en la rue où l'en vent le poisson, tenant d'une part à la maison Colin de Gours et d'autre part à la maison Thomasse, fille à la Rollete ; et frère Guillaume [p. 299] Picherer, chanoine de Saint Ylaire de la Celle de Poitiers et chapellain de la dite chapellenie nous ait humblement supplié que de nostre grace especial et pour le salut et remede de l'ame de nous, et pour consideracion des messes, oroisons et bienfaiz, qui sont et seront faiz en la dite chapelle, ès quiex il veult, pour lui et pour ses successeurs, chapellains de la dite chapellenie, que nous soions participans, nous vueilliens admortir les diz cinquante et quatre soulz de rente. Nous, desiranz l'office divin estre fait devotement et perpetuelment en la dite chapelle, pour le salut et remede de l'ame de nous, de nostre grace especial et auctorité royal, à nous donnée de nostre tres chier seigneur et pere, et de certaine science, avons admorti et admortissons, par la teneur de ces presentes, les diz cinquante et quatre soulz de rente perpetuel, et voulons que li chapellains de la dite chapelle, presenz et avenir, les puissent tenir et posseder heritablement et perpetuelment, sanz ce que il soient ou puissent estre contraint par nous ou noz successeurs, contes de Poitiers, ou par noz justiciers à les mettre hors de leurs mains, ne nous en faire aucune finance, la quele nous leur quittons et remettons à ceste foiz, de nostre grace especial, par la teneur de ces presentes. Et nous, pour ce que ce soit chose ferme et estable à touz jours, nous avons fait mettre nostre seel à ces lettres. Donné à Poytiers, l'an de grace mil trois cenz quarante et cinq, ou mois de septembre.

Par monseigneur le duc, present son aumosnier. Ger[ard] Dorin.