CCCI

Philippes, etc. Savoir faisons à touz, presenz et avenir, que comme pour ce que Guillemete, fille feu Denis Bachelier, du Bournuef en Aunis, nous a fait son heritier, ses heritages touz en quelques choses et quelque part qu'ils fussent nous appartiegnent et à cause de ce aient esté pris et mis en nostre main et en nostre demaine, nous, pour consideracion des bons et agreables services que a faiz à nous et à nostre très chere compaigne, la royne, longuement et loyaument, nostre bien amé Huguet Bonnin1, escuier et maistre de la cuisine de nostre dicte chiere compaigne, à yceli Huguet, pour li et pour ses hoirs, donnons, cessons et transportons en heritage perpetuel touz les diz heritages, maisons, pressoers, vignes, prez, rentes et autres choses, quelles que elles soient, avec tout le droit, raison et accion que nous avons, povons et devons avoir, et qui nous compettent en yceuls et en chascun d'iceuls, les quiex touz ne valent mie plus de trente livres tournois petiz, chascun an, selon commune extimacion de païs, si comme nous entendons. Et nous par ces lettres en mettons le dit Huguet [en saisine], pour li et pour ses hoirs, pour les avoir, tenir et posseoir heritablement comme son propre heritage et en faire sa volenté, comme de sa propre chose, non contrestant que donné aions au dit Huguet l'office de la chastellerie et garde du chastel de Baugency, à trois soulz parisis de gaiges par jour, et aus proffiz et emolumenz [p. 275] acoustumez, à sa vie, et quarante livres de bois2 une foiz. Et que ce soit ferme chose et estable à touz jours mais, nous avons fait mettre nostre seel à ces presentes lettres. Ce fut fait et donné au bois de Vincennes, l'an de grace mil ccc. xliij. ou moys de janvier.

Par le roy. Chambellan.

Sine financia. R. de Balehan.