CCXLVII

Philippes, par la grace de Dieu, roys de France. Savoir faisons à touz, presenz et avenir, que en pure et perpetuelle aumosne, de nostre grace especial, nous avons donné et donnons au prieur de l'eglise Nostre Dame de Plaisance, pour lui et pour ses successeurs, prieurs du dit lieu, la disme que nous avons en la ville et parroche de Pierresac, laquelle vaut chascun an environ xxij. sestiers de blé, que fourment que seigle, et avec ce six sestiers de blé appartenant à la dite disme, pris en la dite ville et parroisse de Pierresac ; et puet tout valoir environ huit livres tournois chascun an, à tenir du dit prieur et de ses diz successeurs à touz jours maiz, ou non de la dite eglise, et à recevoir paisiblement dores en avant, sanz aucun empeschement ou contredit, si comme noz genz les recevoient pour nous, sanz ce que le dit prieur ne ses successeurs soient contraint à en paier finance, ou à les vendre ou mettre hors de leur main en aucun temps. Et comme pour le salut de nostre ame et des ames de nostre chiere compaigne et de Jehan nostre filz, le dit prieur nous ait octroié de sa pure volenté, pour li et pour ses diz successeurs prieurs, troiz messes de Nostre Dame, chascune sepmaine, tant comme nous vivrons, et, après nostre decès, de Requiem, à faire celebrer perpetuelment en la dite eglise, nous cest esperituel benefice ou don avons accepté, requeranz le dit prieur et ses diz successeurs que, si comme gracieusement nous ont octroie le dit benefice, [p. 128] le veillent faire et accomplir, chascun an, diliganment et devotement. Et nous donnons en mandement au seneschal et receveur de Poitou et à chascun d'eulz que de la dite disme, avec les diz six sestiers de blé à ycelle appartenanz, baillent tantost la saisine au dit prieur, et l'en facent joir paisiblement dores en avant et ses diz successeurs, et à nos genz des comptes à Paris, que yceus ostent de nostre demaine et en deschargent du tout les diz seneschal et receveur, qui sont à present, et ceus qui pour le temps avenir seront. Et que ce soit ferme et estable à touz jours maiz, nous avons fait mettre nostre seel en ces lettres. Donné au dit lieu de Plaisance, l'an de grace mil ccc. trente et cinq, ou mois de decembre.

Par le roy. Barriere