CCXXII

Philippes, par la grace de Dieu, etc. A nostre amé et feal [p. 53] le visconte de Toart1, salut et dilection. Comme nous eussiens mandé à vous, et à pluseurs autres nobles de la seneschaucie de Poytou que vous et eus fussiez à nous, à Paris, aus octaves de la Chandeleur darrainement passée, pour aucunes besoignes, sus les queles nous avions à parler à vous et eus, touchant l'estat et le honneur de nous et de nostre royaume, et à la dicte jornée pluseur des diz nobles ne soient venu, et à cens qui venuz y sont nous aiens fait exposer et dire ce pour quoi il et li autre avoient esté mandé, et li diz presenz se soient excusé de nous faire response sus les dites besoignes pour la absence des autres de leur païs, ausquels il en vouloient parler, nous vous mandons que, toutes choses arriere mises, sanz nulle excuse et si chier come vous avez nous et nostre honneur et de nostre royaume, vous ne lessiez en nulle maniere que vous ne soiez à Poytiers, au jour de ces prochaines pasques flories, par devant noz amez et feaux l'evesque d'Amiens2, et Robert d'Artois, conte de Beaumont le Roger3, nostre chier cousin, les quels nous envoions au dit lieu pour parler à vous. Si les creez sur ce que il vous diront des dites besoingnes de par nous et faites tant de ce que il vous diront que nous vous en doions savoir gré. Donné à Paris, le xxii^e jour de fevrier, l'an de grace mil trois cenz et XVIII4.