[p. 289]

CCCV

Don à Pierre des Champs, écuyer de Guillaume Flote, chancelier de France, d'une maison dite la Salle Berthelot, avec le bordage de la Giletière et le fief des Vignes, situés dans la châtellenie de la Garnache, et saisis sur Olivier de Clisson.

  • B AN JJ. 75, n° 338, fol. 204
  • a P. Guérin, Archives historiques du Poitou, 13, p. 289-290
D'après a.

Jehan, ainsné, etc. A touz ceuls qui verront ces presentes lettres, salut. Savoir faisons que nous, en recompensacion des bons et agreables services que Pierre des Champs, escuier de nostre amé et feal Guillaume Flote, chancelier de France, nous a faiz ou temps passé en noz guerres, et esperons que il nous face encores ou temps avenir, à ycelui Pierre avons donné et octroyé, donnons et octroyons perpetuelment et heritablement, pour lui et pour ses hoirs, et pour ceuls qui de lui auront cause, une maison appellé la Sale Berthelot o son appartenance, avecques le bordaige de la Giletiere et le fié des Vignes, tenans à la dite maison, assis en la chastellenie de la Garneche, les quelles puent monter douze livrées de rente à assiete du païs, ou environ, [p. 290] si comme l'en dit, et les quelles choses nous ont esté acquises par la forfaiture de feu Olivier de Clicon1, qui par ses demerites a esté executez. Mandans et commandans par ces meismes lettres au seneschal de Poitou, ou à son lieutenant, que, ou cas que les choses dessus dictes ne vaudront que la somme dessus dicte ou environ, le dit Pierre il mette en saisine et possession des choses dessus nommées, et en ycelles le garde et tiengne paisiblement, osté tout autre detenteur à qui elles n'auroient esté données par les lettres de nostre très chier seigneur et pere, ou par les nostres, données avant la date de ces presentes. Et pour ce que ce soit ferme chose et estable à touz jours, nous avons fait mettre nostre seel en ces lettres. Sauf en autres choses nostre droit et en toutes l'autrui. Données à Conflans, l'an de grace mil ccc. xlv., ou moys de may.

Par monseigneur le duc. Mellou.

Sine financia. Justice.


1 Jean, duc de Normandie et comte de Poitiers, ayant été mis en possession des biens confisqués sur Olivier de Clisson, Jean Sardignon, clerc de ses comptes, fut chargé, pendant le carême de l'année 1344, de recevoir les aveux et dénombrements de tous les fiefs tenus de ce prince dans les châtellenies de la Garnache, de Palluau, de Belleville et de Châteaumur. Ce précieux recueil est conservé parmi les papiers de l'ancienne Chambre des Comptes de Paris, aux Arch. nat., reg. P. 594.