CCLXXII

Philippes, par la grace de Dieu, roys de France. A tous ceulx qui ces lettres verront, salut. Comme autrefois par noz lettres aionz commis et donné povoir à nostre amé et feal chevalier, Itier, seigneur de Maignac, nostre capitaine souverain ès parties de Poitou, Xainctonge, Limosin et ès lieux voisins, de faire certainz explois, si com plus à plain peut apparoir par noz dites lettres, et nous aionz entendu que aucun se sont efforcié et efforcent de venir encontre les choses à li commises et de non obéir à ce, tant que, pour faute de ceulz, le dit capitaine n'a peu ne puet avoir deniers pour distribuer aus genz d'armes, qu'il li convient à tenir à la deffense du païs ; savoir faisons que à ycellui avonz donné et donnonz plain povoir, auctorité et man dement [p. 177] especial de fair enteriner et acomplir toutes les choses et chascune d'icelles, contenues et devisées en noz dictes lettres ; et en oultre li donnonz povoir de anoblir personnes non nobles, en prenant ou faisant prendre pour nous telles composicions ou finances comme il verra pour le miex, et en donner ses lettres ouvertes, les quelles nous confermerons en las de soie et en cire vert, toutes fois que mestier sera. Et volonz que des acquez generaument fais par personnes non nobles de personnes nobles il puisse prendre finance ou composicion, pourveu qu'il ne s'entremettent ou cognoissent des choses qui touchent lez cinquantismes ou rereban, pour le fait ou cause de noz presentes guerres, non obstant lettres empetrez au contraire. Mandonz à tous que au dit capitaine, en ce faisant, obéissent et entendent diligemment. Et en tesmoing de ce, nous avonz fait mettre nostre seel nouvel à ces lettres en l'absence du grant. Donné à Paris, le viij^e jour de aoust, l'an de grace mil ccc. xl1.