DCCXLVII
Rémission accordée à Thibaut Portier, valet de chambre du duc de Berry, qui, pour se venger de Jean de Verberie, sergent à verge au Châtelet de Paris, dont il avait eu autrefois à se plaindre, le fit rouer de coups d'épées et de bâtons, au point qu'il en mourut huit jours après.
- B AN JJ. 139, n° 212, fol. 255
- a P. Guérin, Archives historiques du Poitou, 24, p. 21-24
Charles, etc. Savoir faisons à touz, presens et avenir, nous avoir receu l'umble supplicacion de Thibaut Portier1, [p. 22] varlet de chambre de nostre très chier et très amé oncle le duc de Berry, contenant que comme, pour occasion de ce que Jehan de Verbrie, jadiz sergent à verge de nostre Chastellet de Paris, par avant ce que le dit Thibaut feust ou service de nostre dit oncle, le dit sergent eust prié au dit [p. 23] Thibaut, ycellui estant en l'esglise de Saint Nicolas des Champs, qu'il lui voulsist donner une chopine de vin, auquel sergent respondi le dit Thibaut qu'il n'y oseroit aler pour double qu'il ne l'emprisonnast par vertu d'un gaigement ou quel il estoit obligé à tenir prison pour argent qu'il devoit à une certaine personne. Auquel Thibaut respondist le dit sergent qu'il ne lui menroit point et qu'il issist hardiement ; lequel Thibaut s'en issi d'icelle esglise, à l'affirmation du dit sergent, et incontinent que le dit Thibaut fu hors de l'esglise, le print icellui sergent et le mena en prison en nostre dit Chastellet. Pour le fait duquel cas le dit Thibaut, quant il fu ou service de nostre dit oncle, après ce que nous feusmes derrainement retournez du pays de Flandres2, lui estant logié au Chappeau rouge en la rue neuve Saint Merry à Paris, dist à Symonnet son frere, à Colin de la Sale3, et à Perrin Billart, et à pluseurs autres ses variés et serviteurs : « Se vous ne me vengiez de ce ribaut Jehan de Verbrye, jamais vous ne mangerez de pain ne buvrez de vin que j'aye ». Après lesquelles paroles, le dit Symonnet son frere, pour lui complaire, acompaignié d'icellui Perrin Billart et du dit Colin de la Sale, lequel pour ce fait et autres a esté executé, se transportèrent à l'entrée de la nuit, en la rue au Maire près de la rue Saint Martin à Paris, où demouroit le dit sergent et là le gaitterent jusques à ce qu'il parti du Pot d'estain, où il buvoit, en la dicte rue Saint Martin, et en soy venant en sa maison, le bâtirent telement d'espées et de bastons que dedens huit jours après ou environ ala de vie à trespassement. Pour occasion duquel fait le dit suppliant, doubtant rigueur de justice, n'ose bonnement resider ne converser en nostre ville de Paris, maiz est en voye de de laissier le [p. 24] service de nostre dit oncle, se par nous ne lui est sur ce extendu nostre grace, si comme il dit, requérant humblement que, comme il ait tousjours esté homme de bonne vie et honneste conversation, nous lui vueillons sur ce impartir ycelle. Pour quoy nous, eu considération à ce que dit est et que le dit Thibaut a faicte satisfaction à la femme du dit deffunct, pour contemplation aussi de nostre dit oncle, au dessus dit Thibaut, de nostre grace especial, plaine puissance et auctorité royal, ou dit cas, avons quicté, remis et pardonné, etc., parmi ce toutevois que premiers et avant tout euvre le dit Thibaut baillera et paiera à l'Ostel Dieu de nostre dicte ville de Paris la somme de cinq cens frans d'or. Et par ainsi le restituons à sa bonne fame, etc. Si donnons en mandement par ces mesmes presentes au prevost de Paris et à touz noz autres justiciers, etc. Donné à Saint Denis en France, l'an de grace mil CCC IIIIXX et dix, et de nostre regne le onziesme, ou moys de septembre.
Par le roy en son conseil. G. d'Aunay.