DCCCLXVII

Charles, etc. Savoir faisons à tous, presens et avenir, nous avoir receu l'umble supplicacion de nostre amé Robert de Sales, escuier, seigneur de Chantemerliere1, contenant [p. 368] que, ou moys d'aoust derrenierement passé ot un an ou environ, un nommé Mérigot de Maigné entra ou service du dit suppliant et luy fist serement de le servir et garder son bien et son honneur, tant qu'il demourroit avecques luy, ainsi que s'il estoit son pere, mais nientmoins assez tost après le dit Mérigot estant ou dit service requist la femme d'iceluy suppliant de coucher avec elle et continua de l'en requerre tant que, la sepmainne après Noël ensuivant, si comme la dicte femme l'a dit et confessé, il ot a elle compaignie charnele et en ce continuerent jusques au temps dont cy après sera faicte mencion, senz ce que le dit suppliant, mary d'icelle femme, s'en advisast fors par l'espace d'un moys ou environ avant le cas advenu cy après déclaré, que le dit suppliant s'en souspeçonna, et tant que, le XIII^e jour du dit moys d'aoust derrenierement passé ou environ, la dicte femme du dit suppliant qui en leur lit estoit couchiée avec luy, se leva d'emprès luy environ soleil levant et s'en ala en la sale basse de leur hostel ; et [p. 369] assez tost après ce, le dit suppliant se leva aussi et trouva sa dicte femme et le dit Merigot en present meffait. Lequel Merigot, incontinant qu'il apparçut le dit suppliant, s'en sailly hors de l'ostel par une fenestre et s'enfouy par le vergier du dit hostel, et chaudement le dit suppliant le poursuy, mais il trebucha et chut ou dit vergier, et se releva et poursuy tousjours le dit Merigot, lequel se fu jà si esloingnié que le dit suppliant ne le pot attaindre, et entra ycelui Merigot ès bois et forests estans à ung quart de lieue d'illec ou environ, qui contiennent IX lieues de terre et plus, et là perdy le dit suppliant le dit Merigot; et s'en retourna ycelui suppliant en son dit hostel et parla à sa femme, la quelle lui confessa la vie dessus dicte que avoient menée le dit Merigot et elle. Et tantost après, le dit suppliant monta sur son cheval et ala veoir par les dictes forests s'il pourroit trouver le dit Merigot, lequel il n'y pot trouver. Et lors le dit suppliant s'en retourna en son dit hostel et prist avec luy un varlet à cheval, pour aler à une lieue d'illec au prieuré de Neré, devers Girault et Mery [p. 370] d'Orfueilles2, freres de la dicte femme, qui y demouroient; les quelz il trouva ou chemin et s'en venoient à luy pour ce que desjà le dit fait estoit venu à leur congnoissance, et s'en alerent ensemble ès dictes forests, cerchans et querans le dit Merigot, lequel ilz ne peurent trouver; et pour ce, au soir sur le tart, le dit suppliant et les diz freres de la dicte femme s'en retournerent au dit hostel d'ycelui suppliant. Et l'endemain, vint au dit suppliant par son mandement un nommé Jehan Fregaut, son nepveu, et pour aler cerchier le dit Merigot par les dictes forests, s'acompaigna le dit suppliant des diz freres de sa dicte femme et de son dit nepveu avec deux varlez, meismement que l'en doubtoit au pays d'aler et venir par les dictes forests pour raison de pluseurs murtriers et larrons qui y repairoient et repairent, et eulz garniz chascun d'une coste de fer vestue à couvert et de leur espées, ainsi qu'ilz les ont tousjours acoustumé d'avoir, pour ce qu'ilz sont sur pays de frontiere, alerent et vindrent par chascun jour, jusques au VIII^e jour ensuivant, cerchans et querans le dit Merigot par les dictes forests et environs, fors que aucune foiz, par especial au soir, ilz repairoient au dit hostel du dit suppliant, duquel hostel le dit VIII^e jour, environ heure de vespres, ilz se departirent touz ensemble de cheval et eulz garniz comme dit est chascun d'une coste de fer à couvert et de leurs espées, senz autres armeures, excepté Girault dessus nommé qui avoit uns avant bras avec sa coste de fer et son espée, et passerent tant par jour que par nuit par les dictes forests pour aler à Maigné en Engoulmois, en la maison du dit Merigot, le querir et cercher, et en alant là passerent par le village de Rays assez près du point du jour, et trouverent un bon homme que un de leur varlez, nommé Guillemin [p. 371] Regnart, prist et tira à soy, et après bailla le dit bon homme au dit suppliant et luy demanderent le chemin à Tusson, lequel luy respondi que ilz y estoient bien; et lors ilz luy distrent que il les menast au dit lieu de Maigné, qui est par deça le dit lieu de Husson (sic). Et dist oultre le dit suppliant aus dessus nommez estans en sa compaignie que le dit bon homme fust lié, afin qu'il ne s'en alast, mais il ne fu point lié, car il leur promist que il ne se departiroit point d'eulz que ce ne fust de leur congié. Et en alant, demanda le dit suppliant à ycelui bon homme se il savoit point un petit bois qui estoit par delà le dit lieu de Maigné ; lequel respondy que ilz en estoient bien près. Et arriverent au dit bois, environ demie heure avant soleil levant, et donnerent congié au bon homme dessus dit; et ala le dit suppliant à un bouvier qui estoit près d'illec en l'arée, et aussi y ala après luy Giraut d'Orfueille dessusdit, et luy demanderent laquelle estoit la maison du dit Merigot, lequel la leur monstra. Et après ce, eulz IIII laissierent ou dit bois leurs diz varlez et chevaulx et se transporterent en la dicte maison du dit Merigot, laquelle estoit ouverte, et trouverent le dit Merigot qui encores estoit couchié ou lit, et sa mere qui estoit descouchiée ; auquel Merigot le dit suppliant dist que il se levast, dont il ne vouloit riens faire. Et pour ce, ycelui suppliant sacha son espée et du plat en bailla sur la joe du dit Merigot, en lui disant : « Ribaut, levez sus » ; et lors il se assist ou dit lit et ne se vouloit lever. Et pour ce le dit suppliant le prist par l'un des braz et le tira hors du dit lit, et le fist vestir; et ce fait, le dit suppliant mist au dit Merigot sa sainture par le col et le mena, luy accompaignié des autres dessus nommez, jusques au dit bois où ilz avoient laissié leurs diz varlez et chevaulx, sens ce que ilz feissent force ne violence à la dicte mere du dit Merigot, car ilz luy avoient promis que ilz ne tueroient point ycelui Merigot ; et eulz arrivez au dit bois qui estoit près de II traiz d'arc ou environ de la dicte maison du dit [p. 372] Merigot, lequel suppliant bailla un cop de pié au dit Merigot, dont il chey à terre, et le fist tenir par Aymery d'Orfueille et Jelian Fregaut dessus nommez, à chascun de ses braz, et d'un petit coustel le dit suppliant fendi au dit Merigot la couille et luy osta les couillons, en luy disant qu'il ne luy feroit mal, fors seulement ès membres dont il avoit villenée sa femme. Et atant le dit suppliant et les autres dessus nommez laissierent aler le dit Merigot, lequel à present est sauvé et guery de la dicte plaie. Toutesvoies pour occasion du dit fait, les officiers de nostre très chier et amé oncle le duc de Berry et d'Auvergne, conte de Poitou, se sont efforciez de prendre et emprisonner le dit suppliant, et de fait ont pris et mis en la main de nostre dit oncle la terre d'ycelui suppliant estant en Poitou, avec ses biens meubles, lesquelz ilz ont desplaciez où bon leur a semblé, et ont fait pour occasion de ce pluseurs autres exploiz contre le dit supppliant, senz ce que par sentence ne procès droit de confiscacion soit à aucun acquis des biens d'ycelui suppliant. Et sur ce se dit le dit suppliant deuement avoir appellé, et son appel a relevé dedens temps deu à nostre court de Parlement ; mais par la decision du dit appel, le dit suppliant ne seroit pas hors du delit dessus dit, commis en la personne du dit Merigot, et pourrait après le dit appel le fait principal prendre moult long traict, et finablement en pourroit cheoir le dit suppliant en dangier de justice, se par nous ne luy estoit sur ce impartie nostre grace, si comme il dit ; suppliant que, attendu ce que dit est et que en ceste matiere il a eu et a juste douleur, et que feu Poins de Sales, jadiz chevalier, son pere, et luy aussi, qui ont tousjours esté en pays de frontiere, ont bien et loyalment servi en noz guerres nous et noz predecesseurs, et a tousjours ycelui suppliant esté de bonne vie, renommée et conversacion honeste, senz avoir esté actaint ne convaincu d'aucun autre villain blasme ou reprouche, nous sur ce luy veillons estre piteables et misericors. Pour [p. 373] quoy nous, ces choses considerées, voulans en ceste partie preferer misericorde à rigueur de justice, audit suppliant ou cas dessus dit avons quictié, remis et pardonné, etc. Si donnons en mandement par ces meismes presentes à noz amez et feaulx conseillers les genz tenans ou qui tendront nostre Parlement à Paris, au seneschal de Xanctonge, au bailli de Touraine et des Exempcions de Poitou, d'Anjou et du Maine, et à tous noz autres justiciers, etc. Donné à Paris, ou moys de novembre l'an de grace mil et CCCC, et de nostre regne le XXI^e.
Par le roy, à la relacion du conseil. Philippus.