DCCCV

Charles, etc. Savoir faisons à tous, presens et advenir, nous avoir receu l'umble supplicacion de Jehan Chanceau, né dou pais de Poytou, contenant que comme, quatre ans a ou environ, certains compaignons eussent beu en la court qui est dessoubz le chastel de Meum sur Loire, du quel chastel le dit suppliant estoit lors geolier, et après ce qu'ilz orent beu, ce jour mesmes au soir et de nuit, le dit suppliant eust trouvé d'aventure au dit lieu une tasse d'argent du pois d'un marc ou environ, laquelle il retint par devers [p. 206] lui et la garda par l'espace d'un an et plus, jasoit ce qu'il sceust bien que icelle tasse feust à feu Foulques de Chanac, jadis evesque d'Orléans1, laquelle tasse il rendit tantoust depuis au dit feu evesque. Pour doubte du quel faict, le dit suppliant n'oseroit jamaiz demorer en nostre royaulme, pour doubte de rigueur de justice. Sy nous a humblement supplié que, consideré ce que dit est et que en autres cas il a esté de bonne vie, renommée et honneste conversacion, et que satisfacion est faicte à partie, nous lui vueillons sur ce estendre nostre grace. Pour ce est il que nous, voulans misericorde preferer à rigueur de justice, au dit suppliant ou cas dessus dit avons quictié, remis et pardonné, etc. Si donnons en mandement au bailli de Cepoy et à touz noz autres justiciers et officiers, etc. Donné à Paris, ou mois d'aoust l'an de grace mil CCC IIII^XX et XV, et de nostre regne le quinziesme.
Par le roy, à la relacion du conseil. P. de la Mote.