DCCLXV
Rémission en faveur de Lancelot Rouault et de Perrot Letart, son valet, coupables de meurtre sur la personne de Jean de Bègues, qui entretenait des relations coupables avec la mère dudit Lancelot.
- B AN JJ. 142, n° 150, fol. 91
- a P. Guérin, Archives historiques du Poitou, 24, p. 72-74
Charles, etc. Savoir faisons à touz, presens et avenir, nous avoir oye la supplicacion des amis charnelz de Lancelot [p. 73] Rouaut1, du païs de Poitou, et de Perrot Le Tart, varlet du dit Lancelot, contenant comme le dit Lancelot eust par pluseurs foiz defendu et contredit à un varlet nommé, quand il vivoit, Jehan de Begues2, l'aler, le venir et le repairer en son hostel, pour ce qu'il estoit et est encores fame et renommée publique en la parroisse de Langonou est l'ostel du dit Lancelot, et en la chastellenie de Fontenay le Conte, que le dit feu de Begues avoit longuement maintenu et encores maintenoit lors et amoit par amours la mere du dit Lancelot, et non obstant les dictes defenses, le dit feu de Begues, persévérant en sa mauvaistié et pechié, feust alez par nuyt, d'aguet appensé et au desceu du dit Lancelot, en l'ostel d'icellui Lancelot, en entencion d'avoir la compaignie charnele de la mere d'icellui Lancelot; le quel, quant il sceut que le dit feu de Begues y estoit venuz pour ce que dit est, fu grandement irez et meuz et courreciez [p. 74] , et pour ce courut tantost à l'une des portes de son dit hostel où estoit le dit feu de Begues; le quel de Begues, si tost qui l'apperceu, se en fouy ; maiz les dit Lancelot et Perrot Le Tart, comme touz esmeuz et eschauffez, attindrent et aconsuirent ycellui de Begues, et illecques de chaude cole le bâtirent et navrerent telement que assez tost après il ala de vie à trespassement. Pour occasion du quel fait, le dit Lancelot et Perrot sont en aventure de souffrir peine et tourment corporele, se par nous ne leur est sur ce eslargie nostre grace et misericorde, si comme dient iceulz amis charnelz, supplians que, actendu la jeunesse du dit Lancelot qui n'avoit lors que XVIII ans ou environ, et le blasme et diffame qu'il lui avoit longuement fait et pourchassié et à tout son lignage, et s'efforçoit de faire encores chascun jour le dit de Begues, combienque parpluseurs foiz lui eust defendu le dit Lancelot le repairer en son dit hostel, comme dit est, et que en touz autres faiz lui et le dit Perrot ont tousjours esté gens de bonne vie et renommée, senz avoir esté reprins d'aucun autre vilain cas, nous leur veuillons estre piteables et misericors. Pour quoy nous, etc. à iceulz Lancelot et Perrot Le Tart, et chascun d'eulz, de nostre auctorité royal et grace especial avons quicté, remis et pardonné, etc. Si donnons en mandement au seneschal de Poitou et à touz noz autres justiciers, etc. Donné à Paris, ou mois de mars l'an de grace mil CCC IIIIXX et XI, et de nostre regne le XIIme.
Par le roy, à la relacion du conseil. J. Bertaut.