DCCLXVII
Rémission accordée à Jean Viset, détenu depuis trois ans d'abord dans les prisons du sire de Parthenay, puis dans celles de Jean Girard, chevalier, pour le meurtre de Michel Bastier, son beau-frère.
- B AN JJ. 142, n° 216, fol. 125
- a P. Guérin, Archives historiques du Poitou, 24, p. 76-79
Charles, par la grace de Dieu roy de France. Savoir faisons à touz, presens et avenir, à nous avoir esté humblement [p. 77] exposé de la partie des amis charnelz de Jehan Viset, povre homme, laboureur de l'aage de XXI ans ou environ, que, comme Guillaume Viset et Katin, sa femme, pere et mere du dit Jehan, soient et aient esté conjoins par mariage ensamble et durant leur mariage eussent mariée Perrote Visete, fille du dit Guillaume Viset d'un autre mariage, avecques un appellé Michiel Baster, et depuis les noces faictes le dit Baster eust demandé aux diz Guillaume et Katin la part et porcion appartenant à sa dicte femme, à cause de certains biens meubles, entre lesquelz avoit bestes à laine à partir et diviser, et en faisant le dit partage le dit Baster, par son grant oultrage, s'efforça de prendre et enmener par force et contre la voulenté de la dicte Katin, avec laquelle il faisoit le partage des dictes bestes, l'une des plus belles bestes qui feust ou monceau et farat des dictes brebiz. Et pour ce que la dicte Katin le contredist, ycellui Baster lui dist pluseurs grans injures et vilenies, et de fait pour ce que la dicte Katin s'efforça d'empeschier qu'il ne enmenast la dicte brebiz, le dit Baster qui estoit grant jeunes homs et fort bati et feri moult durement et inhumainement la dicte Katin et la gecta à terre, et telement qu'elle ne se povoit lever ne aidier; sur lequel fait le dit Jehan Viset arriva d'aventure et lui, meu d'amour maternelle, voyant sa dicte mere estre ainsi durement vilenée et batue, et que le dit Baster ne s'en cessoit autrement, mais procedoit tousjours par grant felonnie à batre la dicte Katin qui est vielle et ancienne, sacha un coustel qu'il portoit, et de fait par chaude cole feri le dit Baster d'un coustel telement que mort s'en ensuy en la personne du dit Baster. Pour le quel fait, ycellui Jehan Viset a esté prins et est detenu prisonnier ès prisons de nostre amé et feal le seigneur de Partenay, et depuis a esté rendu en la prison de nostre amé et feal Jehan Girart1 chevalier, comme son subgiet et justiciable [p. 78] , et est en voye d'estre puniz corporelment le dit Jehan, se nostre graece et misericorde ne li est sur ce eslargie; [p. 79] en nous humblement suppliant que, comme en tous autres cas le dit Jehan Viset ait esté et soit de bonne vie, fame, renommée et honneste conversacion, sanz onques avoir esté attaint ne convaincu d'aucun autre villain blasme, et que pour occasion du dit fait le dit Jehan Yiset a esté et demouré prisonnier par l'espace de trois ans ou environ, à grant misere et povreté, pour le débat des diz sire de Partenay et du dit Jehan Girart, nous sur ce lui vueillons impartir nostre dicte grace et misericorde. Pour quoy nous, etc., le fait dessus dit, etc., avons remis, quictié et pardonné, etc. Si donnons en mandement par ces mesmes presentes au gouverneur de la Rochelle et à touz noz autres justiciers, etc. Donné à Paris, ou moys d'avril l'an de grace mil CCC IIIIXX et XII, et de nostre regne le XIIe.
Par le roy, à la relacion du conseil. Freron.