DCCCLXXII
Rémission accordée à Giraud et Aimery d'Orfeuille, écuyers, complices de Robert de Salles, seigneur de Chantemerlière, dans la [p. 386] mutilation qu'il fit subir à Merigot de Maigné.
- B AN JJ. 156, n° 69, fol. 40
- a P. Guérin, Archives historiques du Poitou, 24, p. 385-389
Charles, etc. Savoir faisons à tous, presens et avenir, nous avoir receu l'umble
supplicacion de Girart1 et Aymery
d'Orfueille2, escuiers, freres, aagiez c'est assavoir le dit Girart de XXII ans ou
environ et le dit Aymery de XVIII ans ou environ, contenant que, le venredi XIIIe jour du
mois d'aoust derrenier passé, Robert de Sales, escuier et seigneur de Chantemerliere,
qui a espousée la seur des diz supplians, leur dist que un appellé Merigot de Maigné,
[p. 387] qui avoit esté serviteur du dit Robert, avoit congneu charnelment leur
seur et qu'il les avoit trouvé en present meffait, et qu'ilz lui voulsissent aidier à
querir ledit Mérigot qui s'en estoit fouy; les quelz, comme jeunes gens qu'ilz sont,
lui octroyerent qu'ilz le feroient volentiers, cuidans que icelui Robert deist verité,
dont ilz ont depuis sceu que il n'en estoit riens et que ce n'estoit que jalosie et
sanz cause raisonnable, ainçoiz est la dicte femme du dit Robert damoiselle de grant
honneur, bonne preude femme et de honeste vie et conversacion. Et tantost après ce,
eulx courciez et dolens de ce que le dit Robert leur avoit dit, estans en icelle
douleur, armez de dagues, cotes de maille et d'espées, alerent incontinent avec le dit
Robert qui estoit acompaigné de deux autres personnes, et quisrent le dit Merigot et
tant qu'ilz arriverent, le samedi XXIe jour du dit mois d'aoust avant souleil levant,
en la ville de Rez, et là le dit Robert et les dis supplians trouverent un bon homme,
lequel ilz menerent avec eulx, et lui firent monstrer et enseigner le lieu de Maigné,
où le dit Mérigot estoit. Et quant ilz eurent trouvé le dit hostel, le dit Robert
entra dedens ; lequel Robert trouva le dit Merigot couchié en son lit et le fist lever
et lui mist sa ceinture ou col et l'amena dehors, jusques à un petit boscage qui est
emprès le dit hostel ; et là le dit Robert lui fist le jambet et l'abati à terre, et
quant il fu cheu, le dit Aymery, par le commandement dudit Robert, prinst un des bras
du dit Merigot, et le dit Girart mist le pié sur l'une de ses jambes, et les autres
tindrent le corps et l'autre bras et l'autre jambe du dit Merigot, et le dit Robert
d'un petit coustel qu'il avoit lui fendi la couille et lui osta les genitaires. Et
atant lessierent le dit Merigot, et s'en retournerent, et le dit Merigot s'en ala et
s'est fait guérir3. Pour [p. 388] occasion
des quelles choses les dis supplians doubtent avoir mesprins envers justice. Si nous
ont humblement supplié que, comme en autres cas ilz aient tousjours esté de bonne vie,
renommée et honneste conversacion, sans avoir esté reprins ne convaincus d'aucun autre
villain blasme ou reprouche, et attendu leur jeunesce et la doleur qu'ilz avoient de ce
que ledit Robert leur disoit, qu'ilz [p. 389] creoient fermement estre vray pour
lors, et que les diz supplians ne frapperent oncques ledit Merigot, et si sont clers
non mariez, et attendu aussi les bons et agreables services que les predecesseurs des
dis supplians, et aussi le dit Girart nous ont fait en noz guerres, et mesmement le
dit Giraut, en la compaignie de nostre amé et feal connestable, ou voiaige de
Foiz4 nagaires fait, et aussi
par Olivon d'Orfueille, leur frere ainsné, qui fu tué au siege de Taillebourc5, et que le dit Merigot n'est pas mort, ainçois est guery, et chevauche
et fait autres œuvres de homme sain, et que le dit Robert qui fut principal faiseur du
dit cas en a obtenu de nous remission, nous sur ce leur vueillons impartir nostre
dicte grace. Pour quoy nous, ces choses considerées, voulans en ceste partie
misericorde estre preferée à rigueur de justice, aus diz Giraut et Aymery et à chascun
d'eulx ou dit cas avons remis, quictié et pardonné, etc. Si donnons en mandement par
ces presentes au seneschal de Xainctonge et à tous noz autres justiciers, etc. Donné à
Paris, ou mois d'avril l'an mil CCCC et un.
Par le roy, à la relacion du conseil. Chaligaut.