DCCCXXVI
Rémission accordée à Jean Leroy, qui s'était atïilié à une bande de voleurs et avait pris part avec eux au pillage de l'hôtel de Jean de L'Hôpital près Pamplie.
- B AN JJ. 150, n° 321, fol. 152
- a P. Guérin, Archives historiques du Poitou, 24, p. 258-260
Charles, etc. Savoir faisons à tous, presens et avenir, à nous avoir esté humblement
exposé de la partie de Jehan Le Roy, povre homme laboureur de bras, contenant que trois
ans a ou environ, ainsi qu'il ouvroit en une vigne près de la Roche Fourcaut,
Guillaume Le Roy son frere vint à lui et lui dist s'il savoit autrement gaigner son
pain, lequel exposant lui respondi que non, et le dit Guillaume lui dist que si le
feroit bien, s'il vouloit, et que un nommé Perrot Mabile lui bailleroit deux chevaulx,
et il lui en bailleroit un autre. Et pour ce que les diz chevaulx estoient à
Ron...1, le dit Guillaume loua un cheval,
sur lequel le dit exposant son frere monta, et l'enmena en la compaignie de deux
autres hommes que ilz trouverent, et arriverent en une ville que l'en appelle Melle,
où ilz trouverent deux autres hommes, tant que par nombre ilz furent six, et d'ilec se
partirent touz ensemble et s'en alerent en une ville que l'en appelle Panpalie, et
quant ilz furent à l'entrée de la ville, ilz mirent leurs chevaux en une piece de
soigle, pendent lequel deux de ceulx de la compaignie, c'est assavoir un nommé Jehan
de la Mote et l'autre Peroutot, alerent ouvry la porte de un nommé Jehan de
L'Ospital2, et après [p. 259]
appellerent leurs compaignons. Et quant ilz furent en la court du dit
hostel, pour ce que par l'uis d'icelluy ilz n'y porent entrer, l'un ou deux d'icelle
compaignie entrerent par une cheminée et ouvrirent l'uys aux autres ; ou quel hostel,
tempté de l'ennemy, ilz rompirent pluseurs huches et coffres où ilz ne trouverent
rien ; maiz ilz trouverent sur un dressouer trois tasses pesans chascune demi marc ou
environ, six cuillers d'argent, une houppellande à homme, fourrée de faynes et deux
robes à femmes, fourrées de gros ver, et vint et deux letices, deux nappes, quatre
draps de lit, quatre aulnes de drap de Bruisselles et deux escroes de autre drap, montans à
trois quartiers ou environ ; lesquelles choses ainsi prinses et emblées ilz departirent
en la presence du dit exposant, sanz ce que d'icelles il en voulsit oncques riens
prendre, et leur dit que il n'en avoit rien cure, dont le dit Guillaume son frere lui
dist qu'il prendroit bien pour lui, et il lui respondi qu'il feroit ce que bon lui
sembleroit, et s'en retourna le dit exposant en son hostel au dit lieu de Roche3. Et quant ilz
virent qu'il n'en vouloit riens prendre, doubtans par lui estre accusez, lui
envoyerent par un varlet qui estoit au dit Jehan de la Mote les deux robes à femme
dessus nommées et [dirent] que il les gardast au dit Guillaume, son frere ; lequel
exposant veant leur voulenté, respondi au dit varlet que les dictes robes ne
enterroient jà en sa dicte maison, et les prist et bailla en garde à une sienne
commere. Pour occasion du quel fait, combien que des choses dessus dictes il n'ait eu
aucune chose, icellui exposant, doubtant rigueur de justice, s'est absentez du païs,
ou quel il n'oseroit jamais retourner, se nostre grace et misericorde ne lui est [p. 260]
sur ce impartie, si comme il dit ; et pour ce nous a humblement supplié
que, eue consideracion aux choses dessus dictes, et que en tous autres cas il a
tousjours esté de bonne vie et renommée, sanz aucun villain reprouche, nous lui
vuillons nostre dicte grace impartir et lui estre misericors. Pour quoy nous,
inclinans à sa supplicacion, considerans les choses dessus dictes, à icellui suppliant
ou cas dessus dit avons pardonné, quicté et remiz, etc. Si donnons en mandement par
ces presentes au senescbal de Sanxtonge et de Pierregort et à touz noz autres
justiciers, etc. Donné à Paris, ou mois de décembre l'an de grace mil CCC IIIIXX et
XVI, et de nostre regne le XVIIe.
Par le roy, à la relacion du conseil. Chaligaut.