DCCCLIII
Rémission accordée à Jeanne Ancelin, veuve de Perrotin Rousseau, qui avait frappé Marion Cessé, femme de Jean Papineau, à Niort, bien qu'elle lui eût donné assurement.
- B AN JJ. 154, n° 66, fol. 35
- a P. Guérin, Archives historiques du Poitou, 24, p. 330-332
Charles, etc. Savoir faisons à tous, presens et avenir, à nous avoir esté humblement
exposé de la partie des amis charnelz de Jehanne Ansseline, vefve de feu Perrotin
Rousseau [p. 331] , jadis demourant à Nyort, que, après certain asseurement donné
par la dicte Jehanne à une femme appellée Marion Cessée, femme de Jehan Papineau,
demourant au dit lieu de Nyort, ès termes tenus au dit Nyort par le seneschal
de Poictou ou son lieutenant, la dicte Marion meue de mauvais courage ou autrement
dampnablement, depuis la feste de Pasques derreniere passée, assailli ycelle Jehanne
de parolles injurieuses, en l'appellant par pluseurs fois publiquement, en plaine rue
de la dicte ville de Nyort, en presence de pluseurs personnes dignes de foy « très
faulce pute, vielle mauvaise larronnesse » ; et non contente de ce, la dicte Marion
dist à la dicte Jehanne que elle estoit meurdriere, si comme lui avoit dit un appellé
Jehan Rousseau. La quelle Jehanne, soy voyant estre ainsi injuriée et villenée par la
dicte Marion, comme dit est, fu telement meue et couroucée contre la dicte Marion que
de fait, par chaude cole, elle bouta la dicte Marion de ses deux mains parmi la
poitrine, telement qu'elle la fist cheoir sur le mestier du dit Jehan Papineau, son
mary. Pour occasion desquelles choses, la dicte jehanne, doubtant
rigueur de justice et pour cause du dit asseurement, s'est absentée de la dicte ville
de Nyort, et n'y oseroit retourner ne demourer, se nostre grace et misericorde ne
lui estoit sur ce impartie, si comme dient les dis exposans, requerans humblement que
comme le fait et cas dessus dit, où il n'a mort ne mehaing, soit advenu de chaude cole
et par l'invasion de la dicte Marion qui assailli la dicte Jehanne de parolles,
comme dit est, et que la dicte Jehanne a tousjours esté femme de bonne vie, renommée
et honneste conversacion, non suspecte, convaincue, ne actainte d'aucun autre vilain
cas ou reprouche, nous lui vueillons sur ce impartir nostre dicte grace et
misericorde. Nous adecertes, voulans misericorde estre preferée en ceste partie à
rigueur de justice, à la dicte Jehanne Ansseline, ou cas dessus dit, avons remis,
quicté et pardonné, etc. Si donnons en mandement [p. 332] au senescbal de
Saintonge et gouverneur de la Rochelle, et à tous noz autres justiciers, etc. Donné à
Paris, ou mois de fevrier l'an de grace mil CCC IIIIXX et dix huit, et le XIXe de nostre
regne.
Par le roy, à la relacion du conseil. Lebegue.