[p. 303]

DCCCXLIII

Rémission accordée à Etienne Raouleau, de Notre-Dame de Coussay, pour le meurtre de Pierre Perneteau, amant de sa femme.

  • B AN JJ. 153, n° 311 bis, fol. 214
  • a P. Guérin, Archives historiques du Poitou, 24, p. 303-304
D'après a.

Charles, par la grace de Dieu roy de France. Savoir faisons à tous, presens et avenir, de la partie de Estenne Raoulea, parochien de l'eglise de Nostre Dame de Coussay en Poitou, chargié de femme et de quatre petis enfans, nous avoir esté exposé que il a esté et est conjoint par mariage avec Jehanne Antonnelle, avec la quelle il est maintenu bien et doulcement; depuis le quel mariage, Pierre Pernetea estant marié avec Thomasse Bacheliere, a longuement eu compaingnie charnele avec la dicte Antonnelle. Et pour ce que ja pieça ce vint à la congnoissance du dit exposant, il defendi par pluseurs fois au dit Pernetea que il n'alast ne venist en l'ostel d'icellui exposant en aucune maniere, disant que se il y aloit plus et il le y encontroit, il lui feroit desplaisir de son corps. Et neantmoins le dit Pernetea ne se desista point de converser avec la dicte Antonnelle. Depuis la quelle deffense le dit Pernetea, trois [ans] a ou environ, porta sur fons une fille née [p. 304] et yssue de la dicte Antonnelle, mais ce non obstant il a depuis conversé avec elle et l'a congneu charnelement ; et est advenu que le mardi après lafeste de Penthecouste derrenierement passée, le dit exposant qui avoit esté hors gaignier pour aidier à soustenir la vie de lui et de ses diz enfans, vint en son hostel en la ville de Peyré de Voluyre ou dit pays de Poitou, et illec soupa et se ala couchier en son lit, pour soy reposer ; et après ce, à heure de jour couchié ou environ, le dit Pernetea ala au dit hostel et ainsi qu'il passoit par dessus la palice ou cloison du vergier, le chien du dit exposant abaya si fort que il l'esveila; et lors il se leva et par une fenestre qui estoit et est en sa cambre en bas print un coustel de cuisine et couru sus au dit Per- netea, lequel, sitost qu'il le senti s'en voult fuir, et ainsi qu'il vouloit monter par dessus la dite palice ou cloison, le dit exposant le frapa du dit coustel sur la cuisse ; et ce fait, icellui Pernetea se laissa cheoir de l'autre part, en un foussé ou quel avoit de l'eaue. Et depuis ce, le dit Pernetea s'en ala à son hostel et vesqui dès le dit jour et heure jusques au lundi après ensuivant, heure de prime ou environ, ou quel jour de lundi il ala de vie à trespassement. Pour lequel fait, le dit exposant a esté pris et mis ès prisons du seigneur du dit lieu de Voluire, où il est pour ce detenu prisonnier, et doubte que l'en ne lui vueille garder en ce rigueur de justice, dont ses diz petiz enffans soient en aventure de devenir mendians, se de lui n'avons pitié et compassion, suppliant humblement, etc. Et nous, voulans par misericorde temperer rigueur de justice, au dit Estienne Raouleau ou cas dessus dit avons quicté, remis et pardonné, etc. Si donnons en mandement au bailli de Touraine et des ressors et Exempcions d'Anjou, du Maine et de Poitou, au gouverneur de la Rochelle, et à tous noz autres justiciers, etc. Donné à Paris, ou mois de juing l'an de grace mil CCC IIIIXX XVIII, et le XVIIIe de nostre regne.
Par le roy, à la relacion du conseil. Dominique.