DCCLXXIX
Confirmation des lettres d'absolution accordées par l'évêque de Maillezais, à l'occasion de son joyeux avènement, à Guillaume Perraudeau, curé de Longèves, emprisonné pour le meurtre de Jean Rolland, dit Le Gras, l'un de ses paroissiens.
- B AN JJ. 144, n° 102, fol. 56 v°
- a P. Guérin, Archives historiques du Poitou, 24, p. 132-134
Karolus, etc. Notum facimus universis, presentibus et futuris, quod pro parte
Guillermi Perraudelli, presbyteri, rectoris ecclesie parrochialis de Longua aqua,
Malleacensis diocesis, nobis exhibite fuerunt littere dilecti et fidelis nostri
episcopi Malleacensis, quarum tenor sequitur in hec verba :
Johannes, miseracione divina Malleacensis episcopus, dilecto nobis in Christo
Guillermo Perraudelli, presbytero, rectori ecclesie parrochialis de Longua aqua,
nostre diocesis, in carceribus nostris detento, salutem. Cum de jure et antiqua
consuetudine ecclesie nostre Malleacensis, a tanto tempore hactenus observata quod
memoria hominum in contrarium non existit, episcopi Malleacenses, predecessores
nostri qui pro tempore fuerunt, in suis jocundis adventibus consueverunt detentos in
suis carceribus pro quocunque crimine, pro sue libito voluntatis, expedire a dictis
carceribus et dictos detentos penitus a dictis carceribus, de quibus accusati seu
eciam legitime convicti existerent, absolvere et ipsa crimina eisdem remittere ; et
nos de novo ad ecclesiam nostram Malleacensem, favente [p. 133] Altissimo, in nostro
jocundo adventu nostrum introitum primum fecerimus, teque in carceribus nostris
predictis invenerimus detentum, occasione et causa homicidii per te, ut dicitur,
perpetrati in personam deffuncti Johannis Rollandi, aliàs Le Gras, quondam parrochiani
dicti loci de Longua aqua, seu quod ad dictum homicidium perpetratum auxilium,
consilium prebueras et juvamen, seu quod illud, nomine tuo factum, ratum et gratum
habueras, de quibus apud nos et curiam nostram accusatus et delatus extitisti, licet
nondum convictus, nec confessus, nec sentencialiter condempnatus extiteris, quamvis
per magnum tempus in dictis carceribus pro suspicione predicta detentus fuisti ;
hinc est quod nos, volentes misericorditer erga personam tuam procedere, in favorem et
causa nostri jocundi adventus predicti, et eciam ex multis aliis causis ad hoc nos et
animum nostrum de jure moventibus, te a predictis carceribus nostris expedimus
totaliter et liberamus, dictum crimen homicidii, si et in casu quo illud commiseris,
in personam predicti Johannis Rollandi, alias Le Gras, vel ad illud homicidium
faciendum, committendum et perpetrandum opem, auxilium, juvamen, consilium prebueris
vel favorem, aut ipsum homicidium sic factum ratum habueris atque firmum, tibi
remittimus, te a dicto crimine auctoritate nostra absolvendo, jure partis adverse,
si quod habeat, in omnibus semper salvo, si contra te procedere voluerit civiliter
dumtaxat et non alias; procuratori nostro in et super premissis silencium perpetuum
imponentes; inhibentes omnibus et singulis justiciariis et subditis nostris, sub pena
excommunicationis, quam in ipsos et eorum singulos, si contrarium fecerint, in
scriptis ferimus, ne occasione hujusmodi criminis te molestent, detineant aut alias
quovismodo impediant vel perturbent. In cujus rei testimonium, sigillum nostrum
proprium presentibus litteris duximus apponendum. Datum die dominica qua cantatur in
Ecclesia sancta Dei Jubilate, qua die personaliter[p. 134] fuimus recepti in ecclesia nostra
Malleacensi1, anno Domini
millesimo trecentesimo octogesimo septimo.
Nobis humiliter supplicando ut easdem litteras et contenta in eis laudare et
confirmare et alias ei de nostra providere gratia dignaremur. Quocirca premissis
attentis, dictas litteras et omnia et singula in eis contenta, in quantum juste et
legitime facta fuerunt, rata et grata habentes, eas et ea volumus, laudamus, approbamus
et tenore presentium de speciali gratia confirmamus. Mandantes ballivo Turonensi
ressortorumque et Exempcionum Andegavensis, Cenomannensis et Pictavensis, ceterisque
justiciariis nostris, presentibus et futuris, vel eorum locatenentibus, et eorum
cuilibet, prout ad eum pertinuerit, quatinus dictum Guillermum nostra presenti gratia
et confirmacione uti et gaudere pacifice faciant, ipsum in corpore sive bonis non
molestantes in contrarium, nec molestari permittentes a quoquam. Quod ut ratum et
stabile perpetuo perseveret, nostrum presentibus litteris fecimus apponi sigillum.
Nostro in aliis et alieno in omnibus jure salvo. Datum Parisius, mense februarii anno
Domini M° CCC° nonagesimo secundo, et regni nostri decimo tercio. Per
regem, ad relacionem consilii. N. de Voisines.